Vendimi/ Partive do t’u rimbursohet qiraja e zyrave elektorale. 1000 lekë për metër katror

Partitë politike që garojnë në këto zgjedhje do të përfitojnë mbështetje financiare për zyrat që do të përdorin për qëllime elektorale. Referuar vendimit të miratuar nga qeveria në mbledhjen e fundit, partitë politike që kanë marrë në zgjedhjet e fundit mbi 1 % të votave mund të përfitojnë fonde.

Ato duhet të paraqesin një vërtetim nga KQZ për numrin e votave në zgjedhjet e mëparshme dhe një vërtetim nga Kuvendi për numrin e mandateve.

Komisioni Qendror i Zgjedhjeve do të përcaktojë masën konkrete të fondit publik, që përfiton çdo parti politike në formën e ndihmës financiare vjetore. Fondi publik i miratuar në buxhetin e shtetit, si ndihmë financiare, do të përdoret nga partia edhe për qiranë.

Referuar vendimit, shteti financon për qiranë e ndërtesës së selisë qendrore dhe për jo më shumë se një zyrë vendore për çdo parti, brenda territorit të një bashkie.

“Shteti financon qiranë e ndërtesës për një sipërfaqe jo më shumë se 100 m2 për selinë qendrore dhe jo më shumë se 50 m2 për zyrat vendore të partisë politike, për një vlerë jo më shumë se 1 000 lekë/m2 në muaj për zyra me pajisje dhe jo më shumë se 750 lekë/m2 në muaj për zyra pa pajisje” përcaktohet në vendim, raporton SCAN.

Efektet financiare për përballimin e shpenzimeve për pagesën e qirave të ndërtesave për selinë qendrore ose zyrat vendore të partive politike, përballohen nga buxheti i shtetit në formën e fondit, që shërben si ndihmë financiare publike për kryerjen e veprimtarisë vjetore të partive politike.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.