Vendorët nuk arrijnë të mbledhin taksat – Janar-mars 2023, “gropa” prej taksës së ndikimit në infrastrukturë nga ndërtimet e reja

Të ardhurat nga burimet e veta vendore, që arritën në rreth 7.2 miliardë lekë, shënuan rënie gjatë tremujorit të parë të këtij viti me rreth 16% krahasuar me të njëjtën periudhë të një viti më parë. Raporti i përgatitur nga Co-Plan dhe i publikuar së fundmi nga Ministria e Financave tregon se ecuria negative në të ardhurat nga burimet e veta u përcaktua gjerësisht nga ngushtimi i të ardhurave nga taksat vendore, që shënuan një nivel prej rreth 3 miliardë lekë, në rënie me rreth 49% në terma vjetorë.

Performanca negative në të ardhurat nga taksat vendore udhëhiqet nga rënia e të ardhurave nga taksa e ndikimit në infrastrukturë nga ndërtimet e reja, ndjekur nga taksa mbi pasuritë e paluajtshme. Së bashku, këto dy taksa përfaqësojnë rreth 88% të të ardhurave totale nga taksat vendore gjatë tremujorit të parë të vitit.

Të ardhurat nga taksa e ndikimit në infrastrukturë nga ndërtimet e reja shënuan një nivel prej rreth 1.6 miliardë lekë, në rënie me rreth 63% në terma vjetorë, ku përjashtuar Bashkinë Tiranë, 60 bashkitë e tjera mblodhën vetëm rreth 536 milionë lekë. Ndërkohë, të ardhurat e vendorëve nga taksat mbi pasuritë e paluajtshme regjistruan një vlerë prej rreth 996 milionë lekë, me rënie vjetore prej 4%.

Nisur nga nivelet tepër të ulëta të mbledhjes së këtyre dy taksave qeveria ka hartuar një reformë që pritet të publikohet për konsultim publik, nëpërmjet së cilës synon përmirësimin e formës së taksimit të pronës dhe mbledhjes së saj. Sipas të dhënave zyrtare nga Ministria e Financave, rezulton se të ardhurat nga mbledhja e taksës së pasurisë dhe pronës në vendin tonë përbëjnë 0.3% të Prodhimit të Brendshëm Bruto, ndërsa rajoni ka një mesatare prej 0.7%.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.