Visa dhe Mastercard “distancohen” nga Crypto – Frenohen planet për partneritete të reja me firmat e kriptove

Gjigantët amerikanë të pagesave Visa dhe Mastercard po frenojnë planet për të krijuar partneritete të reja me firmat e kriptove pasi një varg kolapsesh të profilit të lartë tronditën besueshmërinë në këtë industri.

Industria e kriptove pa një përmbysje befasuese të situatës në vitin 2022 pasi falimentimet e kompanive kryesore të industrisë FTX dhe BlockFi tronditën investitorët dhe rritën kontrollin rregullator mbi sektorin.

Si Visa ashtu edhe Mastercard kanë vendosur të shtyjnë lançimin e produkteve dhe shërbimeve të caktuara në lidhje me kripto-n derisa kushtet e tregut dhe mjedisi rregullator të përmirësohen. Një zëdhënës i Visa-s në një deklaratë për agjencinë e lajmeve Reuters u shpreh se dështimet e fundit të profilit të lartë në sektorin e kriptove janë një ‘kujtesë’ e rëndësishme se ka një rrugë të gjatë për të bërë përpara se kripto-ja të bëhet pjesë e pagesave kryesore dhe shërbimeve financiare. Por ai shtoi se kjo nuk e ndryshon strategjinë dhe fokusin e kompanisë për kriptot.

Ndërsa një zëdhënës i Mastercard u shpreh se përpjekjet e kompanisë vijojnë të përqendrohen në teknologjinë themelore të blockchain; dhe se si mund të zbatohet ajo për të ndihmuar në adresimin e pikave aktuale problematike. Por gjithashtu dhe për të ndërtuar sisteme më efikase.

Gjatë dy viteve të fundit, firmat e mëdha të kartave ishin më të joshura nga kripto pasi popullariteti i sektorit së aseteve shpërtheu, me disa që e shpallën atë si zbulimjin e madh të rradhës në financë.

Kompanitë e kartave, të cilat përfitojnë një përqindje të vogël të vlerës së dollarit të transaksioneve që përpunojnë, kishin njoftuar partneritete të shumta me firmat e kriptove dhe kishin krijuar ekipe të veçanta për të eksploruar teknologjinë blockchain. Mastercard u bashkua me huadhënësin e kriptove Nexo në prill për të lançuar atë që e quajti kartën e parë të pagesës në botë “të mbështetur nga kripto”.

Në nëntor, Visa ndërpreu marrëveshjet e saj globale të kartave të kreditit me FTX, vetëm një muaj pasi njoftoi një partneritet të zgjeruar.

Kompania e kartave American Express tha në vitin 2021 se do të merrte në konsideratë përdorimin e kriptos si një opsion të mundshëm në të ardhmen. Por nuk i sheh kripto-token – et si një prioritet strategjik brenda një afati të shkurtër.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.