Vlora Marriott Hotel, i pari në bregdetin shqiptar – Nënshkruhet marrëveshja e bashkëpunimit

Marriott Hotel do të jetë pjesë e projektit gjigand Vlora Marina, duke vendosur standarde elitare në fushën e turizmit dhe mikpritjes. Vlora Marina Residences dhe Marriott International kanë nënshkruar marrëveshjen që i hap rrugën hotelit me 5 yje të certifikuar ndërkombëtarisht në Vlora Marina. Investimi mbi 100 milionë euro parashikon ngritjen dhe menaxhimin e hotelit “Vlora Marriott Hotel” si dhe prezantimin e një koncepti të ri për Shqipërinë dhe rajonin që janë apartamentet e branduara. Si hoteli me 150 dhoma ashtu edhe  apartamentet e brandura do të manaxhohen nën të njëjtën strehë nga i njëjti ekip Marriott, duke garantuar cilësinë dhe standardet më të larta ndërkombëtare.

“Ky hotel me 5 yje pritet të ndryshojë rregullat e lojës në industrinë e hotelerisë në Shqipëri. Përveç 150 dhomave, pjesë e ambienteve të hotelit do të jenë edhe mbi 100 apartamente të branduara. Ky është një koncept krejtësisht i ri, i prezantuar për herë të parë në Shqipëri dhe në rajon. Apartamentet e branduara plotësojnë dëshirat e atyre vizitorëve që preferojnë të akomodohen në një apartament luksoz pa hequr dorë nga cilësia e shërbimeve që ofron një hotel me 5 yje. Sot ne ndodhemi këtu me partnerët tanë nga Marriott, të bashkuar nga vizioni dhe përkushtimi për ta bërë Vlora Marriott Hotel një shembull ideal të hotelerisë së klasit të parë”, theksoi ajo.

Ndërsa përfaqësuesit e Marriott e quajtën këtë marrëveshje një përmbushje të kërkesës që vendi ka për brande të tilla në shërbimin e hospitality.

 “Kjo marrëveshje përforcon kërkesën që ne po shohim në vend për praninë e brandeve ndërkombëtare. Ne jemi të kënaqur për këtë bashkëpunim me Vlora Marina duke forcuar praninë tonë në Shqipëri” tha Silvija Lovreta, Drejtoreshë për Evropën Jug-Lindore, Marriott International.

I përshtatshëm si për  ata që udhëtojnë për biznes, ashtu dhe për turistë, Vlora Marriott Hotel, parashikon të ketë 150 dhoma dhe suita si dhe mbi 100 apartamente për shitje nën emrin  e Vlora Marriott Residences. Hoteli përfshin pishinë të brendshme dhe të jashtme, katër restorante dhe bare, një plazh privat me një beach bar, spa, një qendër fittnesi dhe një hapësirë moderne për biznes dhe takime. Gjithashtu do të sigurohet edhe një qendër socio-argëtuese për vizitorët dhe qytetarët e Vlorës 24 orë në 24.

Rezidencat janë planifikuar të jenë nga 75 deri në 220 m²  me një deri në katër dhoma gjumi, duke u ofruar banorëve akses në palestër private si dhe facilitete të përzgjedhura të hotelierisë. Në ceremoninë e firmosjes së marrëveshjes, ishin të pranishëm edhe personalitete të institucioneve publike, bizneseve që lidhen me hotelerinë dhe turizmin si edhe media.

Elisabeta Dosku/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.