Vonesa në shërbimin Fast Track, Kadastra rimburson qytetarët – Agjencia: Kemi hasur shqetësime 24 orët e fundit për shkak të sistemit të ri

Agjencia Shtetërore e Kadastrës ka bërë me dije se shërbimi i procedurës së përshpejtuar, i njohur si Fast Track, ka hasur disa vështirësi për shkak të implementimit të sistemeve të reja digjitale, shkak për të cilin ka pasur edhe vonesa. Përmes një njoftimi zyrtar, Agjencia bën me dije se vonesat janë të përkohëshme, duke marrë përsipër edhe rimbursimin e qytetarëve për shërbimin e munguar.

“Sistemi elektronik i proçedurës së përshpejtuar (FASTRAK), për shkak të  teknologjisë së re që po aplikon ASHK prej fillimit të korrikut, ka sjellë dje vonesë në shërbimin ndaj qytetarëve”, thekson Agjencia Shtërore e Kadastrës përmes një njoftimi zyrtar. Duke kërkuar ndjesë për këtë problematikë që sjell sigurisht edhe pakënaqësi tek të interesuarit, sqarojmë se shërbimi i proçedurës së përshpejtuar (FASTRAK) nuk ka munguar, dhe çdo problematikë e shfaqur është kalimtare përgjatë proçesit të aplikimit të sistemit të ri. ASHK merr përsipër që për këdo qytetar, i cili ka hasur vonesë në shërbim në këto 24 orë, përveç ndjesës dhe shërbimit të ofrojë edhe rimbursim, thekson Agjencia në njoftim.

Shërbimi Fast Track aplikohet që në vitin 2019 dhe ofron mundësinë e përshpejtimit të procedurave kundrejt një pagese më të lartë. Përmes tij qytetarët e interesuar janë në gjendje të marrin brenda 24 orësh shërbimin për të cilin kanë nevojë. Ky shërbim u ideua për t’i ardhur në ndihmë vecanërisht emigrantëve, të cilët kanë pak kohë në dispozicion për të kryer procedurat për shkak të qëndrimit të shkurtër gjatë periudhave të pushimeve.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.