Zbulohet evazion gjigand në Greqi – 14 biznese shërbimi fshehën të ardhura prej 5,15 milionë euro

Auditimet e Autoritetit të Pavarur të të Ardhurave Publike në Greqi kanë zbuluar një evasion fiskal të jashtëzakonshëm. Kontrollet janë kryer në bizneset e sektorit të shërbimeve, lidhur me dhënien e faturave kur porositë bëhen përmes platformave të dërgesave online.

Bazuar në të dhënat që Autoriteti merr vazhdimisht nga platformat e porositjes, të cilat krahasohen me faturat e shitjes me pakicë, që janë prerë për porositë specifike, u identifikuan 14 biznese të sektorit të shërbimeve dhe hotelerisë që nuk kanë prerë 449 mijë fatura për porosi me vlerë totale 5.15 milionë euro. Pra, këto sipërmarrje kanë mbledhur para’ nga klientët e tyre, por nuk kanë kthyer 592.000 euro TVSH në organet tatimore!

Ndër bizneset e identifikuara janë një kafene në Kretë, që për vitet 2019-2020, nuk ka paraqitur deklarata tatimore mbi të ardhurat dhe TVSH-në, duke fshehur të ardhura në vlerë totale 1 440 000 euro. Gjithashtu, në një restorant në sektorin qendror të Athinës, për vitet 2019-2021, u konstatua se nuk janë lëshuar 91.300 fatura tatimore me vlerë neto totale prej 685.000 euro dhe në një kreperi në Epir, për vitet 2017-2019, u konstatua fshehje e të ardhurave në vlerë totale prej 400 000 euro.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.