Zjarret i kushtojnë SHBA mbi 900 miliardë USD në vit – Humbja më e madhe është në pasuritë e paluajtshme

Zjarret i kushtojnë ekonomisë amerikane nga 394 miliardë deri në 893 miliardë dollarë çdo vit, sipas një raporti të ri nga Demokratët e Komitetit të Përbashkët Ekonomik. Komiteti zbuloi se kostoja më e lartë për ekonominë është humbja e vlerës së pasurive të paluajtshme – me 337.5 miliardë dollarë vitin e fundit – duke pakësuar më tej mundësitë për ata që kërkojnë të bëhen pronarë shtëpish ose që kërkojnë strehim. Zbutja e ekspozimit ndaj zjarrit është kostoja tjetër më e madhe me 202.5 miliardë dollarë në vit. Humbja e të ardhurave është rezultat i njerëzve që humbasin shtëpitë ose vendet e punës për shkak të zjarreve – të vlerësuara në 147.5 miliardë dollarë në vit.

Kostoja totale e zjarreve në ekonominë amerikane është më e madhe se buxhetet e shumë departamenteve qeveritare. Qeveria amerikane shpenzon afërsisht 866 miliardë dollarë në vit për sigurinë e të ardhurave, 766 miliardë dollarë për mbrojtjen kombëtare dhe 677 miliardë dollarë për arsimin dhe shërbimet sociale – të gjitha këto janë më të ulëta se sa mund t’i kushtojnë vendit zjarret. Në nivelin më të lartë, kostoja e zjarreve është pothuajse e barabartë me buxhetin vjetor të qeverisë për kujdesin shëndetësor.

Departamenti i Brendshëm i SHBA-së mbikëqyr buxhetin e vendit për menaxhimin e zjarreve, i cili është 1.77 miliardë dollarë për vitin 2023. Buxheti është rritur gradualisht që nga viti 2020, kur buxheti i menaxhimit të zjarreve ishte vetëm 952 milionë dollarë. Departamenti ka kërkuar 1.94 miliardë dollarë për të menaxhuar zjarret në 2024. Për më tepër, Shërbimi Pyjor cakton rreth 2 miliardë dollarë çdo vit për menaxhimin e zjarreve. Por buxhetet e kombinuara janë vetëm një pjesë e kostove totale të shkaktuara nga zjarret.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.