Turqia rrit shpenzimet për mbrojtjen – 150% më shumë fonde për vitin 2024
Turqia do të ketë në dispozicion më shumë se 40 miliardë dollarë për buxhetin e mbrojtjes në vitin 2024, duke shënuar një rritje prej 150% nga buxheti i këtij viti, në një lëvizje tjetër për të forcuar aftësitë e saj mbrojtëse.
Në vitin 2023, buxheti për mbrojtjen dhe sigurinë është rreth 16 miliardë dollarë. Parlamenti votoi për të zgjatur mandatin që lejon forcat e saj të sigurisë të kryejnë operacione ndërkufitare në Siri dhe Irak për dy vjet të tjerë.
Në një prezantim të projektbuxhetit, zv/presidenti i Turqisë Cevdet Yilmaz tha gjithashtu se qeveria synon të dyfishojë pothuajse eksportet e industrisë së mbrojtjes në 11 miliardë dollarë, nga 6 miliardë dollarët aktualë. Yilmaz shtoi se industria turke e mbrojtjes ka rritur vetëmjaftueshmërinë e saj në 85%, nga 80% e vitit 2023.
Turqia i kushton rëndësi të madhe vetëmjaftueshmërisë dhe ka investuar miliarda dollarë në industrinë e saj të mbrojtjes gjatë viteve të fundit.
Ankaraja përballet me sfida në prokurim pasi administrata e SHBA përjashtoi Turqinë nga programi i përbashkët F-35 për shkak të blerjes nga Ankaraja të një sistemi raketor rus S-400 në 2017 – ën.
Shtetet e Bashkuara të Amerikës kanë bllokuar gjithashtu një marrëveshje për avionë luftarakë Lockheed Martin F-16 prej 20 miliardë dollarësh, pë shkak të kundërshtimeve të Turqisë për anëtarësimin e Suedisë në NATO, por edhe për të ‘ndëshkuar’ presidentin Taip Erdogan për shkeljen e të drejtave e njeriut dhe për fluturimet në hapësirën ajrore të Greqisë fqinje.
Përveç kësaj, disa anëtarë të NATO-s, veçanërisht Kanadaja, Gjermania dhe Franca, kanë vendosur embargo jozyrtare të armëve ndaj Turqisë pas operacioneve të saj të njëanshme ushtarake në Siri vitet e fundit.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.