20 mln USD për qeverisjen digjitale në Kosovë – Kredia e Bankës Botërore synon uljen e kostove financiare për qytetarët!
Banka Botërore ka financuar 20 milionë dollarë për Kosovën me qëllim forcimin e qeverisjes digjitale për ofrim të shërbimeve. Ndonëse financimi është miratuar nga Bordi i Drejtorëve që në muajin mars të këtij viti, marrëveshja për bërjen efektive është firmosur vetëm një ditë më parë.
Projekti, që ka një kohëzgjatje 5-vjeçare, financohet nga kredia koncesionare ofruar nga Shoqata Ndërkombëtare për Zhvillim (IDA), pjesë e Grupit të Bankës Botërore. Kredia, e cila ka maturitet prej 25 vitesh dhe periudhë faljeje 5 vite, do të zbatohet nga Agjencia për Shoqërinë e Informacionit të Kosovës.
Sipas ministrit të Financave, Hekuran Murati, projekti synon digjitalizimin e shërbimeve nga administrata publike dhe rritjen e cilësisë së këtyre shërbimeve për qytetarët. Projekti pritet të ndikojë në uljen e kostove financiare dhe barrës administrative për qytetarët, si dhe rritjen e efikasitetit e transparencës për institucionet publike.
Gjithashtu, projekti do të mbështesë përmirësimet në ndërveprimin e sistemeve qeveritare, zgjidhjeve për rimëkëmbje nga fatkeqësitë, si dhe të platformave të përbashkëta. Ndërkohë, synohet zgjerimi i shërbimeve elektronike të qeverisë përmes përmirësimit të portalit e-Kosova dhe pilotimit të një qasjeje inovative për ofrimin proaktiv të shërbimeve me qytetarin në qendër.
Dorian Koça/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.