200 milionë euro për të “shkatërruar” verën e tepërt – Franca përdor fondet publike për ta kthyer atë në alkool industrial

Qeveria franceze ka njoftuar se do të shpenzojë 200 milionë euro për të shkatërruar prodhimin e tepërt të verës në një përpjekje për të mbështetur prodhuesit në vështirësi dhe për të rritur çmimet.

Disa rajone kryesore të verës në Francë, veçanërisht rajoni i Bordo’, po përballen me probleme të tilla si ndryshimet në zakonet e konsumit dhe koston e jetesës.

Në gjysmën e dytë të vitit 2022, çmimi i verës së kuqe ra me 21% krahasuar me çmimin mesatar të pesë viteve të mëparshme, sipas të dhënave të Ministrisë së Bujqësisë. Në këtë sfond, një në tre prodhues të verës në rajonin e Bordosë po përballen me probleme qëndrueshmërie, sipas shoqatës lokale të fermerëve.

“Programi i rrënimit”, i prezantuar në fillim të këtij viti, synon të reduktojë prodhimin duke i lejuar vreshtarët të ripërdorin tokën për aktivitete të tjera.

Ajo do të zbatohet këtë vjeshtë dhe prodhuesit e verës do të marrin kompensim në fund të vitit. Autoritetet franceze po ofrojnë rreth 6 mijë euro kompensim për çdo hektar të hequr.

Fondet publike do të përdoren për të kthyer verën e pashitur në alkool industrial për parfume, apo dezinfektues duarsh.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.