21 bashki “ngecin” në mbledhjen e të ardhurave – Si ka qenë ecuria gjatë vitit 2022 për pushtetin vendor?

40 nga 61 bashki, kanë arritur që të kenë një performancë pozitive të të ardhurave gjatë vitit që lamë pas, ndërkohë që 21 bashkitë e mbetura kanë pasur një performancë negative në këtë drejtim.  Të dhënat janë publikuar në raportin mbi qeverisjen vendore në Shqipëri 2022 të hartuar nga Instituti për Bashkitë e Shqipërisë, i cili pasqyron numrin e bashkive sipas diferencave në të ardhurat prej taksave, tarifave dhe të ardhurave të tjera për vitin 2022 duke e krahasuar me vitin 2021.

Sipas raportit, kontributin kryesor në këtë rritje e japin bashkitë e cilësuara si “të mëdha” si  bashkia Tiranë (+514.9 milionë lekë), bashkia Vlorë (+236.2 milionë lekë) dhe bashkia Kamëz (+223 milionë lekë).

Nga ana tjetër, performanca negative i atribuohet sërish bashkive të ashtuquajtura “të mëdha” dhe “të vogla” si p.sh. bashkia Lezhë (-106.4 milionë lekë), bashkia Durrës (-67.8 milionë lekë), bashkia Finiq (-38.7 milionë lekë) dhe bashkia Mallakastër (-41.5 milionë lekë).

Raporti pasqyron dhe performancën e bashkive krahasuar me vitin parardhës dhe në tre kategoritë e të ardhurave të veta, taksa, tarifa dhe të tjera. Kështu, 31 bashki kanë mbledhur më shumë taksa gjatë 2022 dhe 36 të ardhura të tjera. Grumbullimi i tarifave shënon përmirësimin më të dukshëm me 49 bashki që kanë performuar më mirë krahasuar me 2021.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.