Kërkesat për kursim energjie në ndërtesa – Qeveria përjashton disa kategori objektesh. Nga njësitë nëntokësore, te magazinat

Qeveria shqiptare ka vendosur të përjashtojë një sërë tipologjish ndërtimesh nga detyrimet që i ngarkon legjislacioni për garantimin e performancës së energjisë në ndërtesa. Sipas vendimit të miratuar në mbledhjen e fundit, përveç godinave që po ndërtohen në kuadër të programit të rindërtimit, detyrimet për të garantuar kursimin e energjisë nuk do t’i kenë më as ndërtesat apo njësitë nëntokësore.

Po ashtu, përjashtohen ato ndërtesa apo njësi nëntokësore me status ushtarak dhe civil të mbrojtjes apo të institucioneve të tjera qendrore për rritjen e sigurisë publike, duke përfshirë ndërtesat që shërbejnë për qëllime stërvitjeje, poligone, tunele, bunkerë strehimi apo magazina ushtarake.

Një tjetër kategori janë edhe magazinat ku mbahen mallra të ndryshme, të cilat nuk kanë datë skadence, përveç atyre që kanë vendosur impiant teknik për kondicionimin e ajrit, si dhe ndërtesat në formën e sallave të hapura.

Të gjitha këto kategori ndërtimesh nuk do të duhet të përmbushin detyrimet e eficiencës së energjisë, për aq kohë sa nuk përdoren si zona që duhet të plotësojnë kërkesat minimale të komfortit, sipas një liste të përcaktuar në vendimin e qeverisë e ku bëjnë pjesë, godina banimi, hotele, restorante, godina industriale, salla koncertesh, etj.

Ky vendim i qeverisë është ndërmarrë, pavarësisht  faktit se kursimi i energjisë përmes aplikimit të masave të eficiencës së energjisë ne ndërtesa është një nga masat kryesore për zbutjen e efekteve të krizës.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.