47 miliardë dollarë humbje nga uragani Ian – Kompanitë e sektorit, pranë falimentit?

Kompanitë e sigurimeve po përgatiten për të paguar nga 28 miliardë deri në 47 miliardë dollarë për të shlyer dëmet e uraganit Ian, që mund të jetë stuhia më e kushtueshme e Floridës që nga uragani Andrew në vitin 1992. Humbjet nga sigurimi i erës për pronat rezidenciale dhe tregtare në Florida pritet të jenë midis 22 miliardë dhe 32 miliardë dollarë, ndërsa humbjet e siguruara nga stuhitë pritet të jenë 6 deri në 15 miliardë dollarë shtesë.

Sipas analistëve të tregut, uragani Ian do të ndryshojë përgjithmonë industrinë e pasurive të paluajtshme dhe infrastrukturën e qytetit dhe siguruesit do të falimentojnë. Më shumë se dy milionë shtëpi dhe biznese mbetën pa energji në Florida të premten, pasi uragani Ian po shkonte drejt Karolinës së Jugut. Industria e sigurimeve gjithashtu pret humbje të sektorit të turizmit në Florida.

Analistët theksojnë se, edhe në strukturat hoteliere ka pasur shumë dëme të raportuara dhe do të ketë një periudhë ku do të ketë mungesë pritjeje për turistët.

Agjencia e vlerësimit të kredisë Fitch tha të enjten se humbjet e siguruara mund të variojnë nga 25 miliardë deri në 40 miliardë dollarë për Florida, të cilat mund të rriten në varësi të efektit të stuhisë në Karolinë. Kjo krahasohet me humbjen prej 65 miliardë dollarësh nga uragani Katrina në vitin 2005 dhe 36 miliardë dollarë humbje nga uragani Ida në 2021.

Rimëkëmbja pritet të jetë e ngadaltë dhe e vështirë për shkak të inflacionit, normave të larta të interesit dhe kostove të punës dhe materialeve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.