70 milionë dollarë shkelje me tenderat, Bashkitë “kampione” – Raporti i KLSH: Dëmi më i madh nga KESH, probleme me përzgjedhjet e fituesve

Gjatë audtimeve të kryera përgjatë këtij viti Kontrolli i Lartë i Shtetit ka konstatuar shkelje të shumta në procedurat e prokurimit të institucioneve publike. Shkeljet janë llogaritur në një total prej rreth 70 milionë dollarësh nga specialistët e KLSH.

Institucioni bën me dije se auditimet e realizuar janë konstatuar problematika të cilat lidhen me mungesën e sistemeve të kontrollit nga strukturat përgjegjëse të prokurimeve, shoqëruar me paligjshmëri të proceseve të prokurimit të fondeve publike, duke ulur efektshmërinë e qëllimit kryesor të ligjit për prokurimet publike, pra atë të sigurimit të efektshmërisë dhe efiçencës maksimale të fondeve të prokuruar. KLSH ka bërë publike listën e institucioneve që kanë shkaktuar këto shkelje, të cilat në total vlerësohen 7.9 miliardë lekë, apo më shumë se 70 milionë dollarë.

Korporata Elektroenergjetike Shqipëtare rezulton me shkeljet më të rënda në procedurat e prokurimit, të cilat në total arrijnë në 1.6 miliardë lekë apo rreth 16 milionë dollarë. Në listë pasojnë tre bashki, me vlerë dëmi mbi 1 miliardë lekë, apo mbi 10 milionë dollarë secila.

Specifikisht bëhet fjalë për Bashkinë Poliçan me shkelje qëe kapin vlerën e 1,18 miliardë lekë, ose 11.5 milionë dollarë, Bashkia Fier me 1.1 miliardë apo afërsisht 11 milionë dollarë, si dhe Bashkia Krujë me 1 miliardë lekë apo afërisht 10 milionë dollarë. Në listë rezultojnë edhe 14 bashki të tjera, por me vlera më të vogla shkeljesh.

Fondi Shqiptar i Zhvillimit është një tjetër subjekt që ka shkaktuar një vlerë të lartë shkeljesh në procedurat e prokurimiit prej 302 milionë lekësh, apo afërisht 3 milionë dollarësh.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.