900 milionë euro për makinat elektrike – Qeveria gjermane synon shtimin e stacioneve të karikimit
Gjermania do të shpenzojë deri në 900 milionë euro subvencione për të zgjeruar stacionet e karikimit të automjeteve elektrike për familjet dhe kompanitë. Ekonomia më e madhe e Europës aktualisht ka rreth 90 mijë pika publike karikimi dhe synon të ketë një milion deri në vitin 2030 me shpresën për të nxitur rritjen e elektromobilitetit, pasi synon neutralitetin e karbonit deri në vitin 2045.
Gjermania kishte rreth 1.2 milionë automjete plotësisht elektrike në rrugët e saj deri në fund të prillit, shumë më poshtë objektivit të saj prej 15 milionë deri në vitin 2030, treguan të dhënat nga autoriteti federal motorik.
Çmimet e larta, diapazoni i kufizuar dhe mungesa e stacioneve të karikimit, veçanërisht në zonat rurale, shihen si arsyet kryesore të vonesës në shitjet e automjeteve elektrike. Ministria e Transportit tha se do të nisë së shpejti dy programe financimi për të mbështetur familjet dhe kompanitë private në ndërtimin e stacioneve të karikimit me furnizimin e tyre me energji elektrike.
Deri në 500 milionë euro subvencione do të jenë në dispozicion nga kjo vjeshtë për të promovuar vetë-furnizimin me energji elektrike në ndërtesat private të banimit, me parakusht që banorët të kenë tashmë një automjet elektrik, shtoi ministria.
Nga vera e ardhshme, 400 milionë euro shtesë do të caktohen për kompanitë që duan të ndërtojnë infrastrukturën e karikimit të shpejtë për automjetet komerciale dhe kamionët.
Qeveria gjermane miratoi në tetor një plan për të shpenzuar 6.3 miliardë euro për tre vjet për të rritur me shpejtësi numrin e stacioneve të karikimit të automjeteve elektrike në të gjithë vendin. Programet e subvencioneve të shpallura së fundmi janë shtesë ndaj atij financimi.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.