Pse gratë e BE-së tani do punojnë ‘falas’ deri në fund të vitit?!

Gratë në Bashkimin Europian nga e marta dhe deri në pjesën tjetër të vitit do të “punojnë falas” në krahasim me homologët e tyre meshkuj. Kjo sepse 15 Nëntori shënon Ditën e Pagave të Barabarta në të gjithë BE-në pasi gratë në të gjithë bllokun vazhdojnë të fitojnë 13% më pak se kolegët e tyre meshkuj për një punë të barabartë.

Progresi në mbylljen e këtij hendeku ka qenë i ngadaltë. Ai është ngushtuar me vetëm 2.8 pikë përqindjeje gjatë dekadës së fundit.

Njëmbëdhjetë shtete anëtare e kanë kaluar tashmë Ditën e Pagave të Barabarta pasi hendeku i brendshëm i pagave gjinore është më i madh se mesatarja e BE-së, duke përfshirë Letoninë dhe Estoninë ku diferenca në pagë është mbi 20%.

Ndërkohë, Luksemburgu kishte diferencën më të ulët në pagë mes burrave dhe grave me gratë që paguhen 0.7% më pak se kolegët e tyre meshkuj. Rumania dhe Sllovenia vijnë pas me dallime prej 2.4% dhe 3.1% respektivisht.

“Puna e barabartë meriton pagë të barabartë: ky është një parim themelues i Bashkimit Europian. Zgjidhja e padrejtësisë së hendekut të pagave gjinore nuk mund të vijë pa ndryshim në pabarazitë strukturore në shoqëri,” thanë komisioneret Věra Jourová dhe Helena Dalli në një deklaratë të përbashkët.

Për të ngushtuar këtë hendek, ata u bënë thirrje vendeve të BE-së që të rrisin punën për të siguruar kushtet e duhura për gratë dhe burrat që të kenë më shumë zgjedhje dhe të ndajnë më mirë përgjegjësitë dhe punën e kujdesit.

Gratë mbajnë peshën kryesore të detyrave shtëpiake dhe të kujdesit për fëmijët me 7.7 milionë gra pa punë për shkak të përgjegjësive të kujdesit, sipas Komisionit. Jourová dhe Dalli u kërkuan gjithashtu eurodeputetëve dhe shteteve të BE-së që të miratojnë Direktivën e propozuar të Komisionit Europian për Transparencën e Pagave sa më shpejt të jetë e mundur.

“Transparenca kontribuon në dhënien fund të paragjykimeve gjinore në paga që nga fillimi dhe fuqizon punëtorët që të zbatojnë të drejtën e tyre për pagë të barabartë për të njëjtën punë ose punë me vlerë të njëjtë”, thanë ato.

Sipas një sondazhi të Eurobarometrit, nëntë në dhjetë europianë (burra dhe gra) mendojnë se është e papranueshme që gratë të paguhen më pak se burrat për të njëjtën punë.

Sondazhi zbuloi gjithashtu se 64% janë në favor të publikimit të pagave mesatare sipas llojit të punës dhe gjinisë në kompaninë e tyre. Qeveria holandeze, për të cilën Dita e Pagave të Barabarta gjithashtu zbarkon më 15 nëntor, tha të hënën se do të nisë një “dialog social” për këtë çështje.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.