65 mijë vende pune në turizëm, paga 3-fish më të larta – Topuzi: Kujdes, Greqia mund të na marrë punonjësit që trajnojmë!
Në pritje të 14 milionë turistëve për këtë sezon turistik , kryetari i Shoqatës së Hoteleri- Turizmit Zak Topuzi, ka thënë se sfidë mbetet rritja e kapaciteteve akomoduese dhe fuqia punëtore. Për SCAN TV, Topuzi ka theksuar se ligji i ri, është një mekanizëm për formalizimin e këtij sektori.
“Angazhimi i qeverisë është ndryshimi i ligjit të turizmit në prag të sezonit, duke patur pasysh që ka qënë një ligj gati 10-vjeccar, ku janë ndryshuar konceptet e mënyra, por problemi qëndron tek standardet. Duke shtuar kapacitetet akomoduese, kjo rritje galopante me 3 shifra, nuk i mjafton Shqipërisë për të përballuar fluksin. Nga viti 2022-2023, gati 4.2 mld euro ishin të ardhurat nga turizmi, por kjo nuk do të thotë që jemi në shifra optimale po të krahasohemi me vendet e rajonit. Performanca jonë ishte e paparashikuar, por jemi akoma larg treguesve rajonalë. Po të shohim raportin e Forumit Ekonomik Botëror, Shqipëria nga 6 vendet e Ballkanit, renditet e 3-ta në performancë”- thotë Topuzi
Përmirësimi i infrastrukturës dhe shërbimeve ka rritur numrin e turistëve, madje Topuzi thotë se kemi gati 2.5 herë më shumë turistë që vijnë dhe nga Mali i Zi.
“Analiza është e thjeshtë. Përmirësimi i infrastrukturës aeroportuale, funksionimi i linjave direkte, ka bërë që një pjesë e banorëve të Malit të Zit të jenë shfrytëzues të aeroportit të Tiranës. Gati 93% e gjithë turistëve që vijnë në Shqipëri janë turistë europianë, gati 50% janë shqiptarë të Kosovës dhe 70% janë turistë rajonalë me vendbanim jashtë Shqipërisë, por jo rezident” shton kreu i Hoteleri-Turizmit në vend.
Brenda 2030, Topuzi thotë se do të trefishohen të ardhurat nga ky sektor, gati 540 mld euro nga turistët elitar duke renditur dhe benefitet që ka vendi krahasur me rajonin ku ka 3 herë më shumë vijë bregdetare se Mal i Zi, por edhe potencialin e madh kulturor, historik e kulinarinë. Sfidë për këtë sektor sipas tij mbetet fuqia punëtore.
“Ky është problem botëror. Në komunikim me Shoqatën simotër të Greqisë, ata kanë nevojë për 65 mijë punonjës për turizmin, një shifër alarmante për një vend me 12-13 milionë banorë, pasi rezulton se ka 1 kamarier apo person shërbimi për 50-60 turistë. Kjo tregon që ne duhet të jemi shumë të kujdesshëm, pasi një pjesë e mirë e atyre që ne trajnojmë mund të na largohet si në Greqi, Gjermani apo vendet e tjera. Janë masa emergjente, propozime që i kemi bërë, madje qeveria financoi studentët e shkollave të turizmit” –thekson Topuzi.
Në lidhje me këtë, kreu i Hoteleri-Turizmit në vend, pohon se edhe pse pagat janë 2-3 fishuar për këtë sektor, nevojiten rregullime ligjore për kodin e punës dhe trajtimin e punonjësve.
Alida Lula / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.