Përfitimet nga regjistrimi i tokave bujqësore – Kreu i KASH, Rrapaj: Formalizimi do rrisë investimet dhe mundësojë kreditimin

Formalizimi apo regjistrimi i tokave bujqësore nuk është përmbyllur ende, ndërsa ajo që është bërë me dije nga Ministria e Buqjësisë është se 60 për qind e regjistrave kadastral janë digjitalizuar, ç’ka do të thotë se të dhënat kanë kaluar në sistem.

Nga studio e emisionit “Box to Box” Agim Rrapaj, kreu i Këshillit të Agrobiznesit Shqiptar rendit përfitimet që kanë qytetarët nga finalizimi i këtij procesi, që kanë të bëjnë me krijimin e mundësisë për sigurimin e pronës, kreditimin dhe rritjen e investimeve.

Rrapaj vuri në dukje se procesi nuk ka përfunduar kryesisht për veriun e vendit, teksa shtoi se ka nisur një projekt pilot për të bërë të mundur përshpejtimin e formalizimit të tyre e më pas digjitalizimin e të dhënave.

Ky proces paraprin edhe aplikimin e taksës së re, që do të nis të aplikohet prej 2028-ës. Kujtojmë që për të mundur përshpejtimin e procesit të regjistrimit të tokave bujqësore të ndara me ligjin 7501, është hequr nga lista e detyrimeve pagesa e taksës së pronës.

Ç’ka do të thotë se qytetarët kanë mundësi të marrin në duar tapinë pa qenë të kushtëzuar, që të kryejnë paraprakisht pagesën e kësaj tarife e cila aktualisht varion nga 700 deri në 5600 lekë në vit për hektarë.

Ada Hazizolli/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.