Investimet e huaja, ku renditet Shqipëria në rajon? – Mbajmë vendin e dytë me 1.49 miliardë euro. IHD, rritje në Ballkanin Perëndimor

Shqipëria së fundmi të ofron mundësi të shumta investimi edhe për sipërmarrësit e huaj. Referuar të dhënave të qëndrës Altax, në tre vitet e fundit, tendenca e investimeve të huaja direkte vijon të jetë në trajtë pozitive përsa i përket vendeve të Ballkanit Perëndimor.

Vendin e parë për fluksin e Investimeve të Huaja Direkte vijon të mbajë Serbia me 4.52 miliardë euro, ndërsa Shqipëria në vendin e dytë me 1.49 miliardë euro.

Vendet e tjera kanë një vlerë investimesh poshtë nivelit 1 miliardë euro. Por ajo që vihet re është se kanë një fluks hyrës nga 487 milionë euro në Malin e zi, në 650 milionë euro në Maqedoninë e Veriut, dhe duke vijuar me 816 milionë euro në Kosovë si dhe 874 milionë euro në Bosnjë Hercegovinë.

Por duke e krahasuar me 2 vitet e mëparshme, në 2023 rritjen më të madhe të IHD-ve e mban Serbia me vlerë nominale 636 milionë euro, ndërkohë Shqipëria ka 458 milionë Euro më shumë, ndërsa Kosova e treta me 366 milionë euro më shumë nga 2021.

Bosnjë-Hercegovina ka një rritje në 2023 me 296 milionë euro më shumë, por Maqedonia e Veriut ka një rritje me 75 milionë më shumë. Sipas të dhënave, vend ii vetëm me një rënie të flukseve hyrëse të investimeve është Mali i zi me 104 milionë Euro më pak se 2021.

Por siç shihet dhe në grafikë, duket se IHD-të për frymë më të larta janë në Malin e Zi dhe ndiqet më pas nga Serbia dhe Shqipëria. Gjithashtu dhe Kosova ka një rritje të ndjeshme të IHD-ve për frymë, por ende mbetet nën nivelin mesatar të rajonit. Përbërja e IHD për këtë periudhë përbëhet nga industria automotive dhe pjesëve për makina, energjia e rinovueshme dhe shërbimet e turizmit dhe ato të teknologjisë, pa harruar edhe investimet që po rriten për industrinë e mbrojtjes.

Diamila Leka/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.