Nafta, sesioni i dytë me radhë në rritje – Mbyllja e tubacionit Keystone dhe rihapja e Kinës mbështesin çmimet
![](https://scantv.al/wp-content/uploads/2022/11/nafta-740x383.jpg)
Nafta po qëndron në rritje edhe në sesionin e sotëm, duke publikuar fitime për të dytën ditë me radhë, për shkak se tubacioni Keystone, që transporton naftë nga Kanadaja drejt Shteteve të Bashkuara, vijon të jetë i mbyllur. Edhe lehtësimi i kufizimeve kundër përhapjes së Covid-19 në Kinë po mbështet çmimet. Nafta Brent e Londrës po tregtohet në rreth 78 dollarë për fuçi, ndërsa nafta Bruto amerikane po tregtohet në mbi 73 dollarë për fuçi.
Mbyllja e tubacionit Keystone, që transporton rreth 620 mijë fuçi naftë në ditë nga fusha naftëmbajtëse Alberta në Kanada, drejt Shteteve të Bashkuara, e ka tkurrur furnizimin e tregut dhe nëse vijon të jetë i mbyllur mund të ulë edhe rezervat e naftës. Ky tubacion vijon të jetë i mbyllur që nga data 7 dhjetor, kur u evidentua një rrjedhje prej rreth 14 mijë fuçi naftë në Kansas të Shteteve të Bashkuara. Kompania që operon tubacionin nuk ka dhënë ende një datë se kur do të rifillojë puna.
Për këtë arsye, analistët parashikojnë se rezervat e naftës në SHBA do të kenë rënë me 3.9 milionë fuçi, gjatë javës që u mbyll më 9 dhjetor. Përsa i përket parashikimeve, analistët e Bank of America parashikojnë se rihapja e suksesshme e ekonomisë kineze, dhe ngadalësimi i rritjes së interesave nga bankat qëndrore mund ta rrisë kërkesën për naftë dhe çmimi i Brentit të Londrës mund të ngjitet deri në 90 dollarë për fuçi.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.