“Shfryhen” bonot e thesarit, thirrja e Ramës nuk jep efekt – Që nga mesi i nëntorit ranë normat e interesit, ashtu si dhe vëmendja e bankave dhe qytetarëve

Ftesa e Kryeministrit Edi Rama në mes të nëntorit të vitit që sapo lamë pas për të investuar në letra me vlerë të qeverisë duket se nuk ka dhënë efektin e pritur. Në ankandet e dhjetorit, ashtu se dhe ato të fillimit të këtij viti, ka pasur interes të ulët për investim në bono thesari, në një kohë që normat e interesit kanë treguar një trend rënës. Ftesa e Ramës drejtuar qytetarëve për të blerë bono thesari u bë në një moment kur norma e interesit për këtë lloj instrumenti me maturim 12 mujor ishte rreth 5.7%.

Pritshmëritë ishin që fitimi i tyre do shtohej edhe më tej në pritje të reflektimit të rritjes së normës bazë të interesit nga ana e Bankës së Shqipërisë. Ftesa u shoqërua me veprime konkrete nga ana e Bankës së Shqipërisë, e cila jo vetëm riktheu sportelin e dikurshëm që u mundëson qyetatarëve veprime me letrat me vlerë, por hapi edhe sportele në 5 qytete të tjera, Elbasan, Gjirokastër, Korccë, Lushnje dhe Shkodër.

Veprime që gjithsesi nuk u materalizuan në rritje të volumit të investimeve në Bono Thesari nga ana e qytetarëve. Norma e interesit të bonove të thesarit me afat maturimi 12 mujor arritën kulmin në ankandin e 15 nëntorit të vitit të shkuar, për të shënuar rënie në ankandet e radhës.

Ato ranë në 5.8% në ankandin pasues të zhvilluar më 25 nëntor, ndërkohë që në ankandin e fundit për vitin 2022, të zhvilluar më 27 dhjetor, ato u shitën me normë mesatare prej 5.47%. trendi rënës vijoi edhe në ankandin e parë për këtë vit, të zhvilluar më 4 janar në vlerën 5.34%.

Për tu nënvizuar është gjithashtu është se në asnjë prej ankandeve të fundvitit Qeveria nuk ka arritur të grumbullojë gjithë vlerën e kërkuar. Në ankandin e fundit të nëntorit ka emetuar një shumë prej rreth 170 milionë dollarësh, por ka arritur të shesë vetëm rreth 110 milionë dollarë.

Në ankandin e fundit të dhjetorit shumë e kërkuar ka qenë afërsisht 160 milionë dollarë, por prej saj është pranuar nga investitorët rreth 100 milionë dollarë. Diferenca ka qenë disi më e vogël në ankandin e parë të janarit, kur shuma e kërkuar nga qeveria ka qenë afërisht 160 milionë dollarë, dhe prej saj janë blerë rreth 130 milionë dollarë.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.