Probleme me menaxhimin e ujësjellësit – UKT: Nivel i lartë i humbjeve. Hapet tenderi për sistemin e mbledhjes së të dhënave
Inxhinierët dhe operatorët e ujësjellës-kanalizime Tiranë nuk kanë informacionin e nevojshëm për të mirëmenaxhuar rrjetin, ndërkohë që ndërhyrjet kryhen manualisht dhe konstatohen vetëm kur dalin në sipërfaqe”.
Kjo është situata e përshkruar nga kompania e Ujësjellës – Kanalizime Tiranë, që shton se mungesat e sasisë së nevojshme të furnizimit me ujë janë të zakonshme, edhe si pasojë e nivelit të lartë të humbjeve.
Për këtë arsye, UKT ka hapur një tender me vlerë 52.8 mln lekë, pa TVSH për hartimin e projektit për instalimin e sistemit SCADA, që është një sistem i centralizuar për mbledhjen dhe shfaqjen e të dhënave. Sipas dokumenteve të tenderit, ky sistem parandalon dhe zbulon defektet në sistemin e furnizimit me ujë, si dhe mundëson reduktimin e humbjeve në rrjet.
Sipas të dhënave nga Enti Rregullator I Ujit, këto të fundit vijojnë të mbeten në nivele shumë të larta e më konkretisht në 62%, pavarësisht objektivëve të vendosur në vitin 2017, kur u miratua rritja e çmimit të ujit për banorët e kryeqytetit.
ERRU argumentoi në atë kohë se propozimi për tarifa të reja u shoqërua me një Plan Biznesi 5-vjeçar, ku skanohej dhe analizohej situata e performancës së UKT-së nëpërmjet treguesve të performancës së shoqërisë, teksa objektivat e përcaktuara ishin të shoqëruara me plane të veprimit për arritjen e tyre.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.