Manifaktura në Kinë rrëzon dollarin – Monedha e gjelbër publikon fitime prej rreth 3%, gjatë shkurtit

Dollari amerikan ka vijuar tendencën në rënie edhe në sesionin e sotëm, pasi aktiviteti i sektorit të manifakturës në Kinë u zgjerua me hapin më të shpejtë që nga prilli i vitit 2012, duke bërë që investitorët të preferojnë asetet me risk dhe të largohen nga monedha e gjelbër, që cilësohet një aset i sigurtë. Shpejtimi i hapit të rritjes në Kinë vjen pas vendimit të autoriteteve për të lehtësuar masat kundër Covid-19, për herë të parë që nga fillimi i pandemisë.

Euro është ngjitur sërish në mbi 1.06 dollarë, edhe për faktin se në dy prej ekonomive më të mëdha të Eurozonës, inflacioni shënoi një rritje surprizë, gjatë muajit shkurt, duke shtuar mundësitë që Banka Qendrore Europiane të vijojë me rritjen e interesave. Edhe paundi ka vijuar tendencën në rritje, pasi Britania e Madhe dhe Bashkimi Europian njoftuan arritjen e marrëveshjes tregtare post Brexit.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 104.8, ndërsa gjatë muajit shkurt ky indeks u rrit me rreth 3%, fitimet e para mujore në 4 muajt e fundit. Në tregun e kriptomonedhave, bitcoin i është rikthyer fitimeve dhe po tregtohet në rreth 23,700 dollarë, ndërsa ethereum po tregtohet në rreth 1650 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.