Rruga Elbasan-Qafë Thanë, shpallen fituesit – Segmentet e korridorit VIII, finalizohen tenderët për 3 lote
Autoriteti Rrugor Shqiptar ka shpallur kompanitë fitusese, për zgjerimin e rrugës Elbasan – Qafë Thanë, pjesë e korridorit 8. Tenderët për 4 lote u shpallën 2 muaj më parë, ndërsa fituesit janë shpallur për 3 prej segmenteve.
Referuar të dhënave nga Agjencia e Prokurimit Publik, punimet në lotin V të rrugës do të kryhen nga kompania Gjoka Konstruksion, teksa vlera e ofertës fituese është 2 467 961 433 lekë, pa TVSH. Ky segment ka një gjatësi prej 1.48 km.
Për lotin VI, që ka një gjatësi prej 1.98 km, fitues është shpallur kompania Alb Star, me një ofertë prej 2 347 709 428 lekë, pa TVSH. Gjithashtu, është finalizuar procedura edhe për lotin VIII të kësaj rruge, ku fitues është kompania Fusha, me ofertën prej 2 224 073 883 lekë.
Ky lot ka një gjatësi totale prej 5.2 km. Ndërkaq, ende nuk është njoftuar fituesi për procedurën tenderuese të lotit VII, që përfshin një gjatësi rruge prej 5.34 km. Fondi limit i vënë në dispzoicion për secalin prej segmenteve ishte rreth 2.5 mld lekë, një total prej rreth 10 mld lekë.
Aktualisht është duke u punuar në 4 lotet e parë të kësaj rruge, duke nisur nga Elbasani, ndërkohë që duke marrë në konsideratë trafikun e rënduar që krijohet në hyrje të qytetit të Elbasanit, është theksuar se ndërtimi i bypassit të këtij qyteti është një nga projektet më prioritare dhe aktualisht po aplikohet për gjetjen e financimit.
Korridori 8 nis nga portet italiane të Barit dhe Brindizit, në portet e Durrësit e Vlorës dhe më pas vazhdon drejt Elbasanit, Shkupit dhe Sofjes, duke mbërritur deri në portet e Burgasit dhe Varnës në Detin e Zi.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.