BQE nuk parashikon ulje të normës në korrik – Të dhënat ekonomike të shtatorit do të jenë vendimtare

Guvernatorët e Bankës Qendrore Europiane e shohin një ulje të mëtejshme të normës së interesit në korrik si të pamundur pas disa të dhënave ekonomike më të forta se sa pritej, duke u përqendruar që tani në takimin e tyre të shtatorit. Lajmi u konfirmua për agjencinë e lajmeve Reuters nga pesë burime të ndryshme.

BQE vazhdoi të enjten me uljen e saj të parë të kostove të huamarrjes që nga viti 2019 nga 4 në 3,75%, duke përmendur përparimin në trajtimin e inflacionit edhe pse pranoi se rritja e çmimeve ka të ngjarë të qëndrojë mbi objektivin e saj edhe për një vit tjetër.

Politikëbërësit që u mblodhën në Frankfurt ranë dakord të mos japin asnjë udhëzim publik për takimin e tyre të ardhshëm më 18 korrik, duke pasur parasysh se rruga përpara për inflacionin ishte me pengesa dhe e pasigurt, thanë burimet.

Por, disa guvernatorë, duke folur në kushte anonimiteti, thanë se nuk kishte gjasa që ata të ulnin përsëri normat muajin e ardhshëm në dritën e të dhënave të fundit, duke përfshirë rritjen e fortë të pagave dhe inflacionin e shërbimeve.

Këta politikëbërës e kishin zhvendosur tashmë fokusin e tyre në takimin e 12 shtatorit, kur BQE do të përditësojë projeksionet e saj ekonomike dhe do të ketë disa tregues të tjerë të inflacionit për t’u marrë në konsideratë.

Një burim tha se një ulje e normës do të ishte e garantuar në shtator nëse parashikimi i inflacionit të BQE-së për tremujorin e fundit të 2025-ës do të mbetej aty ku ka qenë për ca kohë, që është në 1.9-2%.

Presidentja e BQE-së, Christine Lagarde ka veçuar këtë projeksion të qëndrueshëm si dëshmi kryesore që mbështet vendimin e së enjtes për të ulur normat.

Dorina Kurtaj/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.