Taksimi i super të pasurëve – Ekonomistët: Debati duhet të fillojë me nivelin 2%

Një taksë vjetore prej 2% mbi pasuritë që tejkalojnë 1 miliard dollarë është pika fillestare për një diskutim global mbi rritjen e barrës për miliarderët e nën-taksuar. Deklarata u bë nga ekonomisti francez Gabriel Zucman.

Zucman, i cili themeloi Observatorin e pavarur të Taksave të BE-së, u ngarkua nga presidenca braziliane e G20-ës për të paraqitur një raport mbi këtë çështje për diskutim nga ministrat e financave të 20 ekonomive më të mëdha të botës në një takim në korrik. Ekonomisti francez u shpreh se qëllimi i këtij plani është të ofrojë një bazë për diskutime politike.

Zucman tha se ai shpresonte që një taksë e tillë mund të materializohej në më pak se nëntë vjet, që është koha që u desh për të rënë dakord për një taksë minimale globale mbi fitimet e korporatave shumëkombëshe, të zbatuar tashmë nga disa vende.

Përveç Brazilit – që është ekonomia më e madhe e Amerikës Latine – Franca, Spanja, Kolumbia, Belgjika dhe Bashkimi Afrikan e kanë mbështetur idenë, së bashku me Afrikën e Jugut, e cila do të marrë presidencën e G20-ës vitin e ardhshëm.

Zucman, një profesor në Shkollën Ekonomike të Parisit dhe Universitetin e Kalifornisë, Berkeley, tha se ka mënyra të ndryshme për të zbatuar idenë, duke përfshirë taksën minimale të të ardhurave të miliarderëve të propozuar në SHBA nga presidenti Joe Biden, i cili synon individët me më shumë se 100 milion dollarë pasuri.

Kjo taksë do t’i detyrojë të gjithë amerikanët që kanë një pasuri neto jashtëzakonisht të lartë t’i nënshtrohen një norme tatimore minimale individuale prej 25%, pavarësisht nëse kthimi vjen nga dividentët, fitimet e realizuara kapitale ose fitimet e parealizuara.

Sipas Zucman, duke pasur parasysh normat e kthimit të vëzhguara, propozimi i Biden është më ambicioz se standardi ndërkombëtar prej 2%, pasi një taksë minimale prej 25% e aplikuar për një kthim bruto prej 11.3% është e barabartë me një taksë minimale prej 2.8% mbi pasurinë.

Zbatimi i rregullit global do të rriste 200 miliardë deri në 250 miliardë dollarë në vit të ardhura tatimore nga rreth 3.000 individë, tha ekonomisti, duke shtuar se shtrirja e taksës tek ata me mbi 100 milionë dollarë do të gjeneronte një shtesë prej 100 deri në 140 miliardë dollarë. Raporti tregon se nga viti 1987 deri në vitin 2024, pasuria mesatare e familjeve më të pasura në botë prej 0.0001% është rritur me rreth 7% në vit, e përshtatur për inflacionin, duke tejkaluar ndjeshëm normën mesatare vjetore të rritjes së pasurisë globale prej 3%.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.