Kriza e strehimit, hiper turizmi dhe leksionet nga Barcelona – Një ekuacion për krizën e strehimit dhe ruajtjes së industrisë së “artë”

Dorina Kurtaj/ SCAN

Një mori turistësh sjellin me vete para, por edhe probleme, parametër vendimtar i të cilave është kriza e strehimit. Në këtë kuptim, Barcelona – si shumë destinacione të tjera të njohura turistike – është bërë viktimë e suksesit të saj. Me Spanjën vendin e dytë më të vizituar në botë pas Francës – Greqia renditet e 13-ta – kryeqyteti katalanas me 1.62 milionë banorë tërhoqi 16 milionë vizitorë vetëm vitin e kaluar.

Ky fluks ka krijuar një “shpërthim” në qiratë afatshkurtra, shumë prej të cilave janë përmes platformës Airbnb. Dhe jo vetëm. 68% e tyre janë në prona në qendër të qytetit. Fatkeqësisht, efektet ishin pak a shumë të paracaktuara. Më të lartat në nivel kombëtar, çmimet e qirave për metër katror u rritën prillin e kaluar me 14% nga viti në vit. Gjatë një dekade, qiratë janë rritur me 68% dhe kostoja e blerjes së një prone me 38%. Të ballafaquar me krizën e përshkallëzuar të banesave, autoritetet komunale në Barcelonë njoftuan kohët e fundit një ndalim të qirave afatshkurtra nga nëntori 2028. Ky është një veprim drastik, pas një vendimi të vitit 2016 që e bëri kryeqytetin katalanas qytetin e parë të madh europian që gjobit Airbnb për lëshimin e pronave turistike të paregjistruara. Që atëherë, asnjë licencë e re për qira afatshkurtër nuk është lëshuar dhe rreth 10.000 prona të paligjshme me qira afatshkurtër janë mbyllur. Pothuajse 3.500 prej tyre vlerësohet të përdoren si vendbanim kryesor sot.

Numri i qyteteve që vendosin kufizime të rrepta për qiratë afatshkurtra po rritet me shpejtësi. I prekuri i parë dhe i mësuar, Nju Jorku filloi të zbatojë nga shtatori i kaluar një ligj të vitit 2022, i cili ndalon marrjen me qira të shtëpive për më pak se 30 ditë. Ky është në thelb një ndalim ‘de facto’ i qirave afatshkurtra.

Me strehimin e përballueshëm si një kërkesë kryesore, u njoftua një legjislacion i ri – paralelisht me revokimin e lejeve të apartamenteve turistike – që do t’i detyrojë ndërtuesit të ndajnë të paktën 30% të shtëpive të reja për banesa sociale. Në zonat më të njohura të qytetit, hapja e njësive të reja hoteliere ishte e ndaluar midis 2015-ës dhe 2023-shit.

Aktualisht, sipas kompanisë spanjolle të analizës së të dhënave Mabrian, numri i përgjithshëm i vendeve me qëndrim të shkurtër në Barcelonë përfaqëson 67.6% të kapacitetit total të hotelit në qytet. Dhe shifrat e muajit qershor të këtij viti tregojnë se çmimi i një nate për vizitor ishte mesatarisht 56 euro për akomodimin për pushime, krahasuar me 167 euro në hotelet me 3 yje dhe 175 euro në njësitë hoteliere me katër yje.

Sot Spanja nxjerr 11% të PBB-së së saj nga turizmi dhe 12% të punësimit.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.