Çregjistrohen 3857 makina me “moshë” 22-vjeçare – Për çfarë ngelin më shumë mjetet në Kontrollin Teknik?

Diamila Leka/ Scan

 

Referuar të dhënave të Drejtorisë së Përgjithshme të Shërbimeve të Transportit Rrugor në periudhën Janar-Korrik 2024, në total janë testuar 237,865 mijë mjete, duke shënuar një rritje prej 15.8% krahasuar me të njëjtën periudhë të dy viteve më parë, nga ku 78.7% të mjeteve të testuara janë automjete (4+1 – 8+1 vende). Ndërkohë, 26.5% e testimeve janë kryer në Drejtorinë Rajonale të Shërbimeve të Transportit Rrugor Tiranë.

Por si është raporti i mjeteve të ngelura në kontrollin Teknik?

DPSHTRR njofton se në këtë periudhë kanë ngelur 74,826 mjete të ngelura ose 31.5% e totalit të mjeteve kanë ngelur ose janë refuzuar.

Ndërkohë arsyet e ngeljes janë 46% e mjeteve pasi kanë mangësi vizuale e funksionale, 24.6% për shkak të sistemit të shkarkimit të gazrave, 15% për sistemin e drejtimit dhe 14.4% për shkak të sistemit të frenimit

Ndërsa përsa i përket ritestimit të mjeteve, 22% e totalit të mjeteve janë ritestuar. Por mjetet që janë mbi 22 vjet, DPSHTRR raporton se 3857 mjete me moshë mesatare 22 vjeçare janë çregjistruar përgjithmonë, ose 15.2% krahasuar me periudhën janar-korrik të vitit 2023.

DPSHTRR risjell në vëmendje që ndalohen reptësisht ndërhyrjet në odometër, ndryshimet konstruktive dhe çdo ndërhyrje tjetër e cila përbën kërcënim për sigurinë rrugore.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.