Kina do të ndërtojë fabrikë të baterive litium në Turqi – Pekini investon 500 mln USD për sipërmarrjen e përbashkët

Kristi Ceta/SCAN

 

Kompania kineze Ganfeng Lithium njoftoi se ka nënshkruar një marrëveshje me prodhuesin kryesor turk të baterive klasike për të investuar 500 milionë dollarë në një objekt të përbashkët për prodhimin e baterive të litiumit.

Jiangxi Ganfeng Battery Technology, si një degë e Ganfeng Lithium dhe prodhuesit turk të baterive Yigit Aku, do të ndërtojë një linjë prodhimi turke me kapacitet vjetor të barabartë me rreth pesë gigavat-orë energji.

Përveç linjës së prodhimit të baterive, projekti përfshin edhe paketimin e tyre në Turqi.

Yigit Aku, një kompani e themeluar në vitin 1976 në Ankara, ka katër fabrika prodhuese dhe dy qendra kërkimi dhe zhvillimi. Është prodhuesi, eksportuesi e ricikluesi më i madh i baterive në Turqi dhe bashkëpunon me më shumë se 500 partnerë në mbi 100 vende.

Ndërmarrja e përbashkët e kontraktuar përfshin hapjen e qendrave të reja shkencore dhe zhvillimore me fokus në teknologjitë e reja dhe shkëmbimin e pronësisë intelektuale në fushën e teknologjive të avancuara të baterive litium.

Bëhet fjalë edhe për bateritë e automjeteve elektrike me elektrolit të ngurtë (ASSB), bateritë me fuqi të lartë për automjetet e rënda dhe bateritë për transport detar dhe aeronautikë.

Vetë Turqia nuk ka rezerva të mëdha litiumi, por Kina ka rezerva të forta të brendshme, një pjesë e madhe e të cilave janë në Rrafshnaltën Tibetiane. Megjithatë, shteti aziatik është një importues i madh i litiumit, kryesisht nga Australia, Kili dhe Argjentina. Pekini është përpunuesi më i madh i metalit në botë dhe prodhuesi më i madh i baterive të litiumit.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.