Apple “pasuron” Irlandën – Kompania i detyrohet Dublinit 13 mld euro taksa të prapambetura

Kristi Ceta/SCAN

 

Një vendim historik nga gjykata e lartë e Bashkimit Evropian vendosi që Irlanda do të marrë 13 miliardë euro taksa të papaguara nga Apple, një fitim i papritur që Dublini kishte shpenzuar disa vite për ta shmangur.

Kjo e lë shtetin e vogël anëtar të BE-së në një pozitë të vështirë politikisht, megjithëse të lakmueshme. Ligjvënësit irlandezë do të përcaktojnë mënyrën më të mirë për të shpenzuar paratë përpara zgjedhjeve të përgjithshme, të cilat duhet të mbahen jo më vonë se marsi i vitit të ardhshëm.

Në një vendim që Gjykata Evropiane e Drejtësisë e cilësoi si përfundimtar, gjykata e lartë e BE-së vendosi që Apple duhet t’i paguajë Irlandës miliarda euro taksa të prapambetura.

Apple tha në një deklaratë se ishte e zhgënjyer me vendimin, ndërsa qeveria irlandeze e përshkroi rastin si “një çështje që tani ka vetëm rëndësi historike”.

Qeveria tha në një deklaratë se “nuk i jep trajtim tatimor preferencial asnjë kompanie apo tatimpaguesi”. Një zëdhënës shtoi se do të fillonte procesin e transferimit të aseteve të mbajtura në një fond ruajtjeje në vend.

Irlanda, e cila shërben si bazë e Apple në BE, ka një nga normat më të ulëta të taksave të korporatave në bllokun 27-vendesh.

Për vite me radhë, Dublini argumentoi vazhdimisht se prodhuesi i iPhone nuk duhet t’i paguajë taksat e papaguara. Qeveria e kishte kundërshtuar çështjen me frikën se mund të kërcënonte aftësinë e vendit për të tërhequr investime nga kompanitë që duan të kufizojnë faturën e tyre tatimore për fitimet jashtë shtetit.

Megjithatë, vendimi i Gjykatës Evropiane të Drejtësisë konfirmoi vendimin e Komisionit Evropian të vitit 2016 se vendi i dha gjigantit të teknologjisë amerikane “ndihmë të paligjshme që Irlanda duhet të rikuperojë”.

Vendimi vjen në një kohë kur Irlanda është në pozitën e pazakontë për të mbajtur një suficit buxhetor prej disa miliardë eurosh, pjesërisht për shkak të fuqisë së të ardhurave nga taksat e korporatave.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.