Tregtia me Kosovën, morëm më shumë dhe dërguam më pak – Eksportet në rajon shënuan “boom” me Bosnje dhe Hercegovinën

Armela Duka/SCAN

Në muajin gusht të këtij viti, tregtia e jashtme e Shqipërisë me vendet e rajonit, përfshirë Kosovën, Maqedoninë e Veriut, Serbinë, Malin e Zi dhe Bosnje Hercegovinën, paraqitet me rënie si në drejtim të eksporteve ashtu edhe të importeve. Konkretisht, totali i eksporteve dhe importeve shënuan rënie me 13.5% dhe 4.5% respektivisht.

“Scan Intel” ka analizuar shifrat për të kuptuar sesi paraqitet marrëdhënia e tregtimit mes Shqipërisë dhe vendeve të rajonit. Shifrat tregojnë se Kosova vazhdon të jetë partneri kryesor rajonal për vendin tonë. Eksportet drejt Kosovës gjatë këtij muaji arritën në afro 3.1 miliardë lekë. Por, edhe pse vlera e tyre është mjaft e lartë, krahasuar me një vit më parë kemi rënie prej 17.4%.

Ndërkohë, me Serbinë vlera e eksporteve arriti në 367 milionë lekë, duke u rritur me 7.4% në krahasim me një vit më parë.  Nga ana tjetër, me Bosnje Hercegovinën dhe Malin e Zi, eksportet u rritën me 16.9% dhe 5.1% përkatësisht. Në terma vjetorë eksportet me Maqedoninë e Veriut kanë rënë me 20.9%, duke arritur në afro 9.2 miliardë lekë.

Sa i përket importeve me vendet e tjera të rajonit, vendi ynë ka forcuar marrëdhëniet tregtare vetëm me Bosnje Hercegovinën dhe Kosovën. Konkretisht, Kosova ka njohur një rritje prej 59.5% të importeve duke arrritur në vlerën 1.7 miliardë lekë, krahasuar me 1.1 miliardë lekë në të njëjtën periudhë të një viti më parë. Me Bosnje Hercegovinën rritja e importeve ishte 28.5%. Nga ana tjetër, Maqedonia e  Veriut ka njohur një rënie të importeve me 28.6%, rënia e dytë më  e lartë pas Malit të Zi që ishte 52.5%. Ndërkohë me Serbinë importet ranë me 18.8%.

Por çfarë thonë shifrat për tetëmujorin e parë të vitit 2024? Gjatë periudhës Janar-Gusht 2024, vlera më e lartë e eksporteve u arrit me Kosovën dhe Bosnje Hercegovinën. Konkretisht, eksportet arritën në 26 miliardë lekë me Kosovën, dhe 2.1 miliardë lekë me Bosnje Hercegovinën. Ndërsa me Maqedoninë e Veriut, eksportuam afro 9.2 miliardë lekë në tetë muaj të këtij viti.

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.