A është gati bujqësia për të shmangur përmbytjet? – Raporti/ 27 hidrovore në gatishmëri, ndërhyrje në rrjetin kullues

Me nisjen e shirave të parë në stinën e vjeshtës, fillojnë të shfaqen edhe problematikat për fermerët që lidhen me përmbytjet dhe shkatërrimin e të mbjellave. Por si rezulton situata këtë vit? Referuar raportit 8 mujor të zbatimit të buxhetit në, nga 2.1 miliardë që është buxheti për këtë zë për vitin 2023, është realizuar rreth 43.9 %.

Ministria e Bujqësisë bën me dije se kanë përfunduar punimet për mirëmbajtjen e objekteve të infrastrukturës së ujitjes, që ndikuan në sezonin ujitës të këtij viti. Ndërkohë në raport thuhet se vazhdojnë me intensitet punimet për pastrimin e rrjetit kryesore kullues, ku aktualisht janë realizuar rreth 80% e punimeve. Bllokimi i rrjetit kryesor kullues është një ndër shkaqet kryesore të përmbytjeve të tokave bujqësore.

Sipas raportit, gjithashtu është mundësuar funksionimi normal i 27 hidrovorëve për kullimin e rreth 70,000 ha, ndërkohë, që po punohet për përfundimin e remonteve të hidroforëve të remonteve të zakonshme të elektropompave dhe pajisjeve elektrike të lëshimit dhe në vijim kolaudimi përfundimtar i tyre, për pasjen në gatishmëri të hidrovoreve në fillim të sezonit me reshje.

Sa i takon investimeve, nga 42 objekte gjithsej të këtij programi:  15 objekte, janë në vazhdim nga viti 2022, nga të cilët, në 12 objekte kanë përfunduar punimet, ndërsa 3 objekte janë në proces dhe deri tani janë realizuar rreth 60% e punimeve civile.  27 objekte janë të reja, me vlerë 682 milion lekë, nga të cilët, 7 kanë të parashikuar të gjithë financimin brenda vitit 2023, ndërsa për 20 objekte të tjera, financimi shtrihet kryesisht në 2 vite 2023-2024.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.