Aktiviteti tregtar i KESH – Nuk arrihet depozitimi i energjisë elektrike, sigurohen 41.5 mln euro nga shitja

Teksa situata e favorshme hidrike ka rritur prodhimin e energjisë elektrike, Korporata Elektroenergjetike Shqiptare nuk ka mundur të sigurojë një kontratë për depozitimin e saj. Në një procedurë të hapur 2 javë më parë për shkëmbimin e 33 600 mWh energji nuk mori pjesë asnjë pjesëmarrës, duke bërë që sasia e vënë në dispozicion të shitet me një çmim prej 59.39 euro/ mWh. Kjo nuk është hera e parë që një procedurë e tillë nuk arrin të finalizohet me sukses, për shkak të mos shfaqjes së interesit.

Teksa më herët, KESH ka argumentuar për TV SCAN se kjo situatë vjen si pasojë e vendimit të qeverisë që përcakton se depozitimi bëhet me koeficient 1:1, që do të thotë se merret një MWh, atëherë duhet të kthehet po 1 MWh, si dhe pasiguria në tregje.

“Në këtë kontekst, kjo është e leverdishme për depozituesin, por jo tregtarin”, – tha KESH në atë kohë. Paralelisht, edhe optimizimi i portofolit ka patur të njëjtin fat, duke qenë se një tender të zhvilluar së fundmi, KESH arriti vetëm të shesë energjinë, por jo ta blejë të njëjtën sasi me çmim më të leverdisshëm.

Gjithsesi, KESH ka arritur të sigurojë të ardhura nga shitja e energjisë elektrike, ndonëse çmimi mbetet më i ulët se në tregjet ndërkombëtare. Nga ky aktivitet, që nga fillimi i vitit  janë siguruar rreth 41.5 mln euro.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.