Vijojnë punimet për ndërtimin e marinës së parë në vend – Do jetë portë hyrëse për turizmin shqiptar. Do shtojë 200 mijë turistë çdo vit

Vijojnë punimet për ndërtimin e Marinës së parë në Shqipëri, një World Class Marina , e cila është projektuar për të qenë një ndër më të mëdhatë në rajonin e Ballkanit. Vlora Marina është një investim strategjik, i cili transformon tërësisht standardet e deritanishme të turizmit që ofron Shqipëria,  me një vlerë prej 40 milionë euro. Trema&Pomgrad  kompania kroate, një ndër më prestigjiozet me eksperiencë mbi 70 vjeçare, e cila ka  ndërtuar portet më të mëdha turistike në Mesdhe dhe Afrikë,  është ajo që po zhvillon projektin e Vlora Marina.

Përfaqësuesi i kompanisë Trema&Pomgrad, i cili po mbikqyr punimet në Vlora Marina, për Scan Tv, shprehet se faza e parë e projektit do të përfundojë që në nëntor të këtij viti, ndërkohë që struktura do mundësojë ankorimin e mjeteve të standardit ndërkombëtar që sezonin e ardhshëm. E parashikuar për të përfunduar brenda 3 viteve, Vlora Marina e lidh Shqipërinë  në një sistem më të gjerë komunikimi në Mesdhe dhe gjithashtu josh atë pjesë të turizmit që sot nuk vjen ende në Shqipëri.

“Kompania jonë quhet Pomgrad, e vendosur në Kroaci dhe pjesë e grupit Strabag nga Austria dhe po zbaton këtë projekt madhor në bregdetin Shqiptar. Po ndërtojmë platformën ku do ankorohen mjetet turistike, e cila do të jetë 250 metra e gjatë e mbështetur mbi 84 pilota. Aktualisht po zhvillojmë fazën e parë të projektit. Po vendosim pilotat e po pastrojmë dhe thellojmë fundin e detit, pasi deri tani ka qenë port industrial. Është një sfidë por punimet po shkojnë sipas planit. Faza e parë e përfundon perpara fundit të këtij viti, ndërkohë që sezonin e ardhshem kjo platforme do sherbejë për ankorimet e mjeteve te standartit nderkombetar si dhe anijeve turistike të qytetit.”

Menaxheri i projektit  Vlora Marina, Ervin Bacaj shprehet se me përfundimin e projektit do të flasim me të vërtetë për turizëm elitar detar në Shqipëri, ndërsa përfitimi ekonomik do të rigjallërojë tërësisht qytetin bregdetar të Vlorës.

Një shkrim i fundit i agjencisë italiane të lajmeve Ansa, e cilëson Vlora Marina si projektin më të rëndësishëm të shpërthimit të turizmit në Adriatik, ndërsa theksonte se Shqipëria kishte rritjen më të madhe ne pellgun e Adriatikut sa i takon lundrimit me 53.9% pasagjerë më shumë se një vit më pare. Vlora Marina sjell për herë të parë në Shqipëri një zhvillim urban miks, krejt autentik,me 438 vende për ankorim, apartamente Premium dhe një rrjet të njohur të brandeve luksoze me 5 yje të hotelerisë.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.