AMF asiston rregullatorin ukrainas për legjislacionin e BE – Mete: Keni gjithë mbështetjen tonë në proces, Shqipëria rrugëtim domethënës në këtë drejtim

Autoriteti i Mbikëqyrjes Financiare do të asistojë Komisionin e Letrave me Vlerë të Ukrainës në procesin e përafrimit të kuadrit ligjor me legjislacionin dhe direktivat e Bashkimit Evropian. Shqipëria hapi së fundmi negociatat e anëtarësimit dhe është në një fazë më të avancuar, ndërsa Ukrainës iu dha disa javë më parë statusi i vendit kandidat.

Me ndërmjetësimin e Bankës Botërore, e cila ka asistuar Shqipërinë në procesin e hartimit të kuadrit të ri ligjor për tregjet nën mbikeqyrjen e Autoritetit, këtë herë AMF do të japë eksperiencën e fituar deri tani për rregullatorin ukrainas. Drejtori i Përgjithshëm i AMF, Ervin Mete në një takim online të zhvilluar me kreun e rregullatorit ukrainas të tregut të titujve, shprehu gadishmërinë për të ofruar gjithë asistencën e nevojshme.

“Keni gjithë mbështetjen tonë në këtë proces. Ne kemi bërë një rrugëtim domethënës në këtë drejtim. Kemi patur dy asistenca, me nga 2 vite secila, nga Banka Botërore, që na kanë ndihmuar të avancojmë sa i përket përafrimit të kuadrit ligjor me legjislacionin e BE-së. Në vitin 2020 u miratuan ligjet e reja për tregjet e kapitalit dhe sipërmarrjet e investimeve kolektive, ndërsa aktualisht po finalizojmë ligjin e ri për fondet private të pensioneve”, tha ai.

Nga ana e tij, kryetari i autoritetit mbikëqyrës ukrainas, Ruslan Magomedov e falenderoi AMF-në për frymën e bashkëpunimit dhe gadishmërinë e treguar.

“Ju falenderojmë për gadishmërinë dhe mbështetjen. Besojmë se eksperienca e fituar nga ana juaj në këtë proces do të na ndihmojë të ecim më shpejt në rrugën që kemi për të bërë, me përafrimin legjislativ, sa i përket fushës tonë”, u shpreh Ruslan Magomedov, Kryetar i Komisionit të Letrave me Vlerë në Ukrainë.

Ukraina vijon të përballet me pasojat e rënda të agresionit rus, që ka shkaktuar humbje të mëdha të jetëve njërëzore, por edhe probleme të tjera të shumta, shoqëruar me efekte në ekonomi dhe tregjet financiare, pasoja të cilat janë ndjerë në të gjithë Botën.

Lorenc Rabeta / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.