Aplikimet për tarifat e reja të ujit – ERRU, ujësjellësve: Afati i fundit është 30 shtatori

Shoqëritë e ujësjellës – kanalizimeve kanë afat deri në datën 30 shtator për të paraqitur aplikimet për tarifa të reja pranë Entit Rregullator të Ujit. Ky dikaster ka pranuar kërkesën e Agjencisë Kombëtare të Ujësjellës Kanalizime për shtyrjen e afatit, që sipas legjislacionit në fuqi është data 30 qershor e çdo viti. Sivjet, ky proces ka një rëndësi të veçantë për shkak se shoqëritë rajonale duhet të shkojnë drejt unifikimit të tyre për zonat ku ato ofrojnë shërbim, që pas reformës ka sjellë bashkimin e kompanive.

Reforma do të finalizohet me krijimin e 15 shoqërive, nga 58 që ishin deri vitin që shkoi, teksa aktualisht janë krijuar 12 prej tyre. Kjo nënkupton se një shoqëri, tashmë përfshin disa bashki ku aktualisht apikohen tarifa të ndryshme të ujit, por që duhet të shkojnë gradualisht drejt unifikimit. Përshembull ujësjellësi i Durrësit, tashmë përfshin edhe Shijakun, Krujën, Kavajën dhe Rrogozhinën, ndërsa ujësjellësi i Korçës, ka në përbërje edhe Devollin, Ersekën, Maliqin dhe Pustecin.

Sipas metodologjisë së re të përllogaritjes të çmimeve nga pagesat e ujit, duhet të mbulohen jo vetëm nevojat për të ardhura të shoqërisë, për mbulimin e kostove të operimit, por edhe mbulimin e kostove të investimeve që kryhen nga ujësjellësit, çka rrjedhimisht sjell rritjen e tyre. Ndërkaq, Enti Rregullator i Ujit ka parashikuar vështirësi në unifikimin e tarifave, duke qenë se diferencat e tarifave aktuale ndërmjet zonave janë të mëdha, për shkak të kostove mjaft të ndryshme të operimit dhe të cilësisë së shërbimit në njësitë përbërëse të tyre.

Sipas Entit, një unifikim i sforcuar i tarifave në të gjithë zonën e shërbimit, që sjell një rritje të menjëhershme të tyre në njësitë me tarifa relativisht të ulta, mund të sjellë reaksione të forta nga konsumatorët me pasojë ulje të normës së arkëtimit dhe ulje të aftësive likuiduese financiare të shoqërisë.

Për këto arsye, Enti Rregullator i Ujit ka sugjeruar që unifikimi i tarifave për këto shoqëri mund të realizohet në bashkërendim të ngushtë në nivel strategjik me qeverinë qendrore dhe ERRU-në për të parashikuar një politikë të përshtatshme subvencionimi në vlerë dhe kohë, në mënyrë që unifikimi të bëhet gradualisht dhe i pranueshëm për konsumatorët.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.