Arrihet marrëveshja për reformën e tregut të energjisë – Bisedimet u shtynë për shkak të mosmarrëveshjes franko-gjermane

Ministrat e Energjisë së Bashkimit Europian arritën një marrëveshje të përkohshme për reformimin e tregut të energjisë elektrike të bllokut, duke thyer një bllokim disa mujor në bisedimet që u penguan nga mosmarrëveshjet mbi përdorimin e subvencioneve për investimet në energji.

Bisedimet kishin ngecur për muaj të tërë për shkak të mosmarrëveshjes franko-gjermane mbi përdorimin e skemave të investimeve të mbështetura nga shteti për projektet e energjisë së pastër. Skemat, të njohura si Kontratat për Diferencën – CFD, u lejojnë qeverive të rikuperojnë fitimet nga prodhuesit e energjisë kur çmimet e energjisë elektrike rriten.

Në qendër të mosmarrëveshjes ishte shqetësimi i Gjermanisë se rregullat e reja do t’i lejonin Francës të merrte fitime të mëdha nga flota e saj bërthamore – e cila furnizon 70 % të energjisë elektrike – dhe t’i rishpërndante ato në industrinë e saj, duke i dhënë vendit një avantazh konkurrues. Parisi këmbënguli se politika e energjisë është një zgjedhje sovrane dhe se blloku përfiton nga elektriciteti i lirë me energji atomike.

Në një koncesion për Francën, ministrat e Energjisë ranë dakord që qeveritë mund të vendosin të aplikojnë Kontratat për Diferencën për investimet që synojnë rifuqizimin e konsiderueshëm të gjeneratorëve ekzistues të energjisë, rritjen e kapacitetit të tyre ose zgjatjen e jetës së tyre, sipas draftit përfundimtar. Kjo mund të lejojë Parisin të përdorë Kontratat për Diferencën për të zgjatur jetëgjatësinë e reaktorëve të tij më të vjetër bërthamorë.

Por në një formë mbështetjeje ndaj Gjermanisë, vendet ranë dakord gjithashtu që Kontratat për Diferencën duhet t’i nënshtrohen disa rregullave të projektimit të përcaktuara nga Komisioni Europian. Këto rregulla duhet të sigurojnë që çdo rishpërndarje e të ardhurave nuk krijon shtrembërime të panevojshme të konkurrencës dhe tregtisë në tregun e brendshëm.

Kompromisi vjen një javë pasi presidenti francez Emmanuel Macron u takua me kancelarin gjerman Olaf Scholz për të zgjidhur mosmarrëveshjet e tyre mbi politikën energjetike në Hamburg. Propozimi do të përparojë në negociatat ndërinstitucionale me Parlamentin Europian.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.