AZHBR vijon pagesat e fituesve të Programit IPARD II, 90% e fondit është angazhuar

Agjencia për Zhvillim Bujqësor dhe Rural (AZHBR) njofton se po vijon pagesat për subjektet fituese të Programit IPARD II, teksa 90 % e fondit është angazhuar.

Sipas AZHBR-së, programi IPARD II që nga fillimi i thirrjes së parë deri më sot, ka lidhur 503 kontrata me vlerë granti 84.7 milionë euro.

Prej të cilave 496 kontrata janë të nënshkruara nën masat 1, 3 dhe 7 të Programit IPARD II dhe 9 kontrata në Masën 9 “Asistenca Teknike të Programit IPARD II”.

Agjencia bën me dije se ka arritur të angazhojë në kontrata 90 % të buxhetit të Programit IPARD II.

Bazuar në informacionin e publikuar niveli i investimeve dhe përthithjes së fondeve e rendit Shqipërinë të parët midis vendeve të tjera kandidate dhe u vlerësua me nivelin më të lartë të fondeve të Programit IPARD III 2021-2027, ku buxheti i përfituar nëpërmjet tij do të jetë 146 milionë euro BE dhe qeveria shqiptare.

Programi IPARD i cili filloi të aplikohej vetëm në vitin 2018 me tri masa, prodhoi një efekt zhvillimor në bujqësi i cili mundësoi jo vetëm transformimin e sektorit por edhe ndryshimin e mendësisë së operatorëve për të kërkuar investime serioze e teknologji të njëjta me ato të kolegëve të tyre në Europë.

Me këto fonde u ristrukturua zinxhiri i vlerës të shumë produkteve bujqësore duke mundësuar kështu infrastrukturën e tregtimit të tyre brenda dhe jashtë vendit dhe rritjen në mënyrë të vazhdueshme të eksporteve bujqësore edhe në këtë periudhë kaq të vështirë për tregjet.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.