Azia dhe Europa, në garë për gazin – Japonia dhe Korea e Jugut nxitojnë të krijojnë rezerva

Sipas Financial Times, Japonia dhe Korea e Jugut, respektivisht vendi i dytë dhe i tretë në botë për importin e gazit natyror të lëngshëm, po përpiqen të krijojnë rezervat për muajt e dimrit dhe për të tjerët në vazhdimësi, me frikën se do të mbesin pa gaz për shkak të rritjes së kërkesës europiane.

Analistët parashikojnë se në fund të vitit dhe në muajt e parë të vitit 2023, tregu do të shohë Europën dhe Azinë që do të ndajnë mes tyre furnizimet me gaz natyror të lëngshëm që transportohet nëpërmjet detit me anije cisternë shumë të mëdha.

Europa po përpiqet të zëvendësojë gazin natyror të furnizuar nga Rusia dhe kërkesa është aq e lartë sa cmimet e gazit natyror në Europë janë rritur pesë herë më shumë në krahasim me një vit më parë duke shkaktuar pasoja të pashmangshme tek konsumatorët.

Një shoqëri aziatike gazi konfirmoi për Financial Times, se aktualisht po zhvillohet një garë e mirëfilltë për sigurimin e rezervave me gaz natyror të lëngshëm për këtë vit dhe vitin e ardhshëm.

Analistët e konsiderojnë një aktivitet të gjerë atë nga ana e kompanive japoneze dhe koreano jugore për të blerë sa më shumë gaz natyror të lëngshëm në muajt e nëntorit, dhjetorit dhe janarit.

Këto blerje kryen me anë të një kontrate aktive në muaj të ndarë, në mënyrë që të bllokohen cmimet për një periudhë të gjatë. Japonia dhe Korea e Jugit kanë probleme në sigurinë energjitike dhe për këtë arsye po përpiqen të furnizohen përpara kohe.

Azia deri tani ka qenë destinacioni i privilegjuar për gazin natyror të lëngshem, me Kinën, Japoninë dhe Korenë e Jugut që janë importuesit më të mëdhenj të botës.

Europa është e shqetësuar nga fakti se në fund të korrikut fluksi i gazit rus nga gazjellësi kryesor europian Nord Stream 1 u reduktua në 20% të kapacitetit dhe pritet një reduktim i mëtejshëm. Pasoja ishte rritja e kërkesës për gaz natyror të lëngshëm, i cili është bërë dhe më i kushtueshëm.

Sipas agjencisë energjitike amerikane, në katër muajt e parë të vitit vendi ka eksportuar 74% të gazit të saj të lëngshëm në Europë, në krahasim me mesataren prej 34% të një viti më parë. Azia ishte destinacioni kryesor në vitin 2020 dhe 2021.

Kësaj i shtohet dhe rimëkëmbja e aktivitetit ekonomik në Kinë që paralajmëron një ndryshim domethënës në ekuilibrin e tregut të gazit. Nëse cmimi do të vazhdojë të rritet dhe furnizimet të reduktohen, Europa mund të detyrohet të reduktojë konsumin për të ulur kërkesën e brendshme.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.