Senati amerikan miraton ligjin 430 miliardë dollarë – Objektiv janë ndryshimet klimatike dhe ulja e çmimeve të barnave

Senati i Shteteve të Bashkuara të Amerikës miratoi një projekt-ligj gjithëpërfshirës prej 430 miliardë dollarë që synon të luftojë ndryshimet klimatike, të ulë çmimet e barnave dhe të rrisë disa taksa për korporatat e mëdha. Kjo është një fitore e madhe për presidentin Joe Biden dhe demokratët shpresojnë se do të ndihmojë shanset e tyre për të mbajtur kontrollin e Kongresit në zgjedhjet e mes mandatit brenda këtij viti

Pas një seance debati maratonë dyditore dhe përpjekjeve të republikanëve për të mos lejuar miratimin e paketës, senati miratoi legjislacionin e njohur si “Akti i Reduktimit të Inflacionit”, me një votim 51 – 50, me zëvendëspresidenten Kamala Harris që me votën e saj vulosi ‘fatin’ e këtij projektligji duke votuar pro.

Tashmë dokumenti do të dërgohet në Dhomën e Përfaqësuesve për një votim të pritshëm këtë të premte dhe më pas kreu i Shtëpisë së Bardhë do e firmosë.

Lideri i mazhorancës në senat, Chuck Schumer u shpreh se kishte qenë një rrugë e gjatë dhe e vështirë por më në fund qëllimi ishte arritur. Ai saktësoi se ky plan do të reduktojë inflacionin, do të ulë kostot, si dhe do të krijojë miliona vende pune me pagesë të mirë; e gjithashtu është paketa më e guximshme në mbrojtje të klimës në historinë e Shteteve të Bashkuara të Amerikës.

Demokratët janë sulmuar ashpër nga republikanët për 430 miliardë dollarë shpenzime të reja të legjislacionit dhe rreth 740 miliardë dollarë të ardhura të reja.

Legjislacioni synon të reduktojë emetimet e karbonit dhe t’i zhvendosë konsumatorët drejt energjisë së gjelbër, të ulë kostot e barnave me recetë për të moshuarit duke rritur taksat për korporatat dhe të pasurit.

Për shkak se plani ‘paguan vetë’ dhe redukton deficitin federal me kalimin e kohës, demokratët pretendojnë se do të ndihmojë në uljen e inflacionit, një detyrim ekonomik që ka rënduar gjithashtu në shpresat e tyre për të mbajtur kontrollin legjislativ në kuadër të zgjedhjeve presidenciale të vitit 2024.

Republikanët, duke argumentuar se projektligji nuk do të ulë inflacionin, e cilësojnë masën si një listë dëshirash të krahut të majtë që vrasin vendet e punës, dhe që mund të minojë rritjen kur ekonomia rrezikon të bjerë në recesion.

Demokratët miratuan projektligjin duke përdorur një manovër parlamentare të quajtur “pajtim”, i cili lejon legjislacionin e lidhur me buxhetin të shmangë pragun prej 60 votash të dhomës prej 100 vendesh për shumicën e projektligjeve, dhe të kalojë me një shumicë të thjeshtë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.