Mbizotëron pesimizmi tek sipërmarrjet – Përkeqësohet besimi në industri, ndërtim, shërbime dhe tregti

Pesimizmi për të ardhmen e ekonomisë në vend ka mbizotëruar tek sipërmarrjet gjatë muajit korrik. Të dhënat e treguesit të ndjesisë ekonomike të publikuara nga Banka e Shqipërisë rezultuan në rënie me rreth 2.5 pikë në muajin korrik. Megjithatë, vlera mbeti mbi mesataren afatgjatë. Rënia u përcaktua nga përkeqësimi i besimit në industri, ndërtim, shërbime dhe tregti. Ndërkohë, treguesi i besimit të konsumatorëve regjistroi pothuajse të njëjtat vlera si një muaj më parë.

Treguesi i besimit të industrisë regjitroi rënien më të madhe me 3.2 pikë përqindje, i ndikuar kryesisht nga tkurrja e balancës për prodhimin aktual dhe asaj të kontratave porositëse. Ndërkohë, pritjet e bizneseve për prodhimin dhe çmimet në të ardhmen janë në rritje në muajin korrik dhe ato për punësimin janë në rënie të lehtë

Treguesi i besimit në ndërtim regjistroi rënie me 1.9 pikë përqindje krahasuar me një muaj më pare, I ndikuar si nga përkeqësimi i balancës për aktivitetin ndërtues, ashtu edhe nga treguesi për kontratat porositëse. Rënie regjistruan pritjet për punësimin, por edhe ato për çmimet, pas rritjes së dukshme të muajit paraardhës.

Treguesi i besimit në shërbime shënoi rënie me 6.1 pikë përqindje, ndikuar nga performanca më e dobët e treguesve të ecurisë së biznesit dhe kërkesës për shërbime. Bizneset në aktivitetin e shërbimeve vlerësojnë një reduktim të ndjeshëm të punësimit aktual. Ndërkohë, pritjet për punësimin janë në kahun e përmirësimit të lehtë.

Treguesi i besimit në tregti ra me 0.5 pikë përqindje i ndikuar kryesisht nga vlerësimet jo të mira të bizneseve për ecurinë aktuale të biznesit të tyre. Gjithashtu, pritjet për ecurinë e biznesit në muajt e ardhshëm dhe punësimin janë në dobësim, krahas pritjeve për çmime në rritje.

Treguesi i besimit konsumator rezultoi me vlerë thuajse të njëjtë në muajin korrik, por duke vijuar të mbetet larg mesatares afatgjatë. Treguesi pasqyroi vlerësimin më pozitiv të konsumatorëve lidhur me blerjet në shuma të mëdha, si dhe situatën për të ardhurat dhe shpenzimet. Nga ana tjetër, situata e tyre financiare dhe gjendja e përgjithshme e ekonomisë në të ardhmen paraqitet në rënie. Konsumatorët vlerësojnë me rritje ecurinë aktuale të çmimeve, kundrejt pritjeve për ngadalësim të tyre në të ardhmen.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.