Banka botërore dhe klima e biznesit – Publikohet plani për mbrojtjen e tij në 180 vende
Banka Botërore zbuloi metodologjinë e re dhe masat mbrojtëse të përmirësuara për vlerësimin e klimës së biznesit në 180 vende, pasi zbulimet e parregullsive të të dhënave dhe favorizimi ndaj Kinës e detyruan atë të anulojë renditjen e saj kryesore dy vjet më parë.
Banka hoqi renditjen e saj “Doing Business” në shtator 2021, duke përmendur auditimet e brendshme dhe një hetim të pavarur që zbuloi se drejtues të lartë të Bankës Botërore kishin bërë presion ndaj stafit për të ndryshuar të dhënat për të favorizuar Kinën. Ajo përmendi parregullsi të dhënash që rritën gjithashtu renditjen e vendeve të tjera, duke përfshirë Arabinë Saudite, Emiratet e Bashkuara Arabe dhe Azerbajxhanin.
Një edicion pilot i serisë së re zëvendësuese vjetore të quajtur “Business Ready” do të publikohet në pranverën e vitit 2024, duke mbuluar një grup fillestar prej 54 ekonomish në Azi, Amerikën Latine, Europë, Lindjen e Mesme dhe Afrikën Sub-Sahariane.
Më shumë vende do të shtohen në dy vitet e ardhshme ndërsa banka përpunon metodologjinë e saj dhe zmadhon projektin e ri, i cili synon të ndihmojë vendet të tërheqin investime, të shtojnë vendet e punës dhe produktivitetin për të përshpejtuar zhvillimin.
“Business Ready” pasqyron një qasje më të ekuilibruar dhe transparente drejt vlerësimit të klimës së biznesit dhe investimeve të një vendi, sipas deklaratës për media të bankës. Kryeekonomisti i Bankës Botërore, tha se qasja e re mundësoi një masë më të plotë dhe më të mprehtë të klimës së investimeve të vendeve, diçka që ai tha se ishte shumë e nevojshme në një ekonomi globale në mes të një ngadalësimi të përgjithshëm.
“Business Ready” u formua nga rekomandimet e ekspertëve të Bankës Botërore, qeverive, sektorit privat dhe grupeve të shoqërisë civile dhe përfshin për herë të parë të drejtat e punëtorëve, siç përcaktohen nga Organizata Ndërkombëtare e Punës.
Banka do të publikonte të gjitha të dhënat e mbledhura – të dhëna të papërpunuara, pikët dhe llogaritjet e përdorura për të marrë pikët – nga kontribuesit e sektorit privat, si dhe nga anketimet e sipërmarrësve, pronarëve të kompanive dhe menaxherëve. Banka gjithashtu do të vërë në dispozicion mjetet e nevojshme për faktorët e jashtëm për të përsëritur rezultatet e vlerësimeve të të dhënave.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.