Qeveria amerikane, në vështirësi për të paguar – Duke filluar nga 1 qershori nuk do të ketë më para’ për faturat
Presidenti amerikan Joe Biden thirri në takim katër liderët kryesorë të kongresit në Shtëpinë e Bardhë javën e ardhshme pasi Thesari paralajmëroi se qeveria mund të ketë mungesë të parave për të paguar faturat që në muajin qershor. Thesari i SHBA tha se mund t’i mbarojë paratë për të paguar të gjitha faturat e qeverisë në qershor pa një rritje të kufirit të borxhit, duke bërë që Biden të thërrasë për takimin me liderët, përfshirë kryetarin republikan të Dhomës së Përfaqësuesve, Kevin McCarthy, më 9 maj.
Sekretarja amerikane e Thesarit Janet Yellen tha në një letër drejtuar Kongresit se agjencia nuk ka gjasa të përmbushë të gjitha detyrimet e pagesave të qeverisë amerikane “deri në fillim të qershorit dhe potencialisht deri në 1 qershor” nëse Kongresi nuk do të veprojë. Biden thirri në takim McCarthy, si dhe liderin demokrat të Dhomës Hakeem Jeffries, udhëheqësin e shumicës në Senat, Chuck Schumer dhe udhëheqësin republikan Mitch McConnell.
Republikanët e Dhomës së Përfaqësuesve miratuan një projekt-ligj për të rritur kufirin e borxhit javën e kaluar që përfshin shkurtime të mëdha të shpenzimeve, të cilat Senati dhe Biden i kontrolluar nga demokratët thonë se nuk do t’i miratojnë. Dështimi për të vepruar përpara datës së re të vendosur nga Thesari, 1 qershor, mund të bëjë që Shtetet e Bashkuara të mos paguajnë dot për disa, duke shënuar një rast të paprecedentë.
Biden ka thënë se nuk do të negociojë për rritjen e tavanit të borxhit, por do të diskutojë shkurtimet buxhetore pasi të kalohet kufiri i ri. Kongresi shpesh ka shoqëruar rritjen e tavanit të borxhit me masa të tjera buxhetore dhe shpenzimesh. Potenciali i ri “X-date”, i cili merr parasysh faturat tatimore të prillit, është kryesisht i pandryshuar nga një vlerësim i mëparshëm, i lëshuar në janar, duke treguar se qeveria mund të ketë mungesë të parave rreth 5 qershorit. Por Yellen shtoi gjithashtu se ka një hapësirë për lëvizje.
Ajo u shpreh se është e pamundur të parashikohet me siguri data e saktë kur Thesari nuk do të jetë në gjendje të paguajë faturat e qeverisë dhe se do të vazhdonte të përditësonte Kongresin në javët e ardhshme pasi të kishte më shumë informacione.
Pasi u arrit kufiri i huamarrjes prej 31.4 trilion dollarësh më 19 janar, Yellen i tha më parë Kongresit se Thesari do të vazhdonte pagesat për borxhin, përfitimet federale dhe do të bënte shpenzime të tjera duke përdorur masa të jashtëzakonshme të menaxhimit të parave. Një hap i tillë është dhe pezullimi i shitjeve të letrave me vlerë që qeveritë shtetërore dhe vendore përdorin për të mbajtur përkohësisht para të gatshme. Në vitin 2011, një përplasje e ngjashme për tavanin e borxhit e çoi vendin në prag të falimentimit dhe shkaktoi një ulje të vlerësimit të kredisë së vendit.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.