Bankat me kapital vendas, më “miqësore” në kreditim – Refuzuan vetëm 4,6% të kërkesave. Ato me kapital të huaj më “dorështrënguar”

Gjatë gjashtëmujorit të dytë 2022, bankat tregtare raportojnë se kanë marrë në shqyrtim gjithsej 64,338 aplikime për kredi, nga të cilat 8% i përkasin sektorit të “ndërmarrjeve” dhe 92% “individëve”. Krahasuar me një vit më parë, kjo shpërndarje është zhvendosur disi në favor të ndërmarrjeve.

Të dhënat janë publikuar nga Banka e Shqipërisë, e cila zbulon edhe faktin se numri total i aplikimeve për kredi të shqyrtuara nga bankat tregtare ka shënuar rënie me 2.6% krahasuar me gjashtëmujorin e kaluar për të tre kategoritë e klientëve, por rënia ishte më e theksuar në numrin e aplikimeve nga “ndërmarrjet e tjera”. Krahasuar me një vit më parë, numri i aplikimeve gjithashtu ka rezultuar në rënie me 4.2% dhe rënia lidhet vetëm me ecurinë e aplikimeve të individëve, ndërkohë që dy grupet e tjera kanë shënuar rritje.

Në tërësi bankat tregtare kanë qenë më “dorështrënguar” në kredidhënie, pasi në totalin e aplikimeve të marra në shqyrtim gjatë gjysmës së dytë të vitit të kaluar, rezulton se rreth 20.2% e tyre janë refuzuar. Ndërsa për kategoritë e ndërmarrjeve huaja ka “rrjedhur” thuajse normalisht me një përqindje të vogël refuzimi, e kundërta ka ndodhur me individët.

Por, cili ka qenë trendi ndërmjet bankave me kapital shqiptar dhe atyre me kapital të huaj?

Të dhënat e Bankës Qendrore tregojnë se norma totale e refuzimit për kredi nga bankat tregtare me kapital vendas ka vijuar prirjen rënëse të dy viteve të fundit, duke rezultuar në nivelin 4.6%, ndërsa për bankat me kapital të huaj kjo normë është rritur në 28.5%.

Gjatë gjysmës së dytë të vitit të kaluar, të dyja grupet bankare duken më të fokusuara në kreditimin e segmentit të ndërmarrjeve, veçanërisht për ato të mëdha, norma e refuzimit për të cilat ka rënë si në terma gjashtëmujorë, edhe në terma vjetorë. Përsa i përket segmentit të individëve, dy grupet kanë pasur qëndrime të kundërta. Bankat vendase kanë vijuar të lehtësojnë aksesin në kredi për individët, duke refuzuar vetëm 4.6% të aplikimeve, ndërkohë që bankat e huaja shfaqen më pak të interesuara ndaj këtij segmenti, duke refuzuar 28.5% të aplikimeve.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.