Cilat janë 11 shtetet që blejnë peshk nga Shqipëria? – Eksportohen 5.6 milionë euro produkte vetëm në muajin Mars

Sektori i peshkimit është rritur ndjeshëm në vitet e fundit, reflektuar kjo në sasinë e eksportuar jashtë vendit. Referuar të dhënave të tregtisë së jashtme të publikuara nga  INSTAT për muajin Mars dhe të analizuara nga SCAN TV, rezulton se është eksportuar një sasi produktesh deti prej 858 ton, me një vlerë e cila arrin në 5.6 milionë euro, vetëm në një muaj. Por cila është harta e shteteve ku shkon ky produkt?  Si në sasi ashtu edhe në vlerë, Italia dhe Serbia janë dy shtetet kryesore qe furnizohen nga vendi ynë me peshk dhe produkte të tjera deti, ndjekur nga Maroku, Kosova, Kroacia dhe Spanja.

Ndërkohë, në sasi më të vogël eksportohet edhe në Malin e Zi, Maqedoninë e Veriut, Poloni, Tailandë, Greqi. Sektorit të peshkimit vitet e fundit i janë krijuar një sërë lehtësish fiskale, si heqja e akcizës për karburantin, heqja e taksës së karbonit, zero TVSH për rrjetat, anijet, pajisjet elektronike, zero TVSH frigoriferëve, motorëve të anijeve të peshkimit si dhe kanë qenë në fokus të mbështetjes përmes skemave kombëtare, kryesisht sa i takon rinovimit të flotës detare.

Shqipëria eksporton çdo vit rreth 2,000 ton peshk të freskët të akuakulturës (veçanërisht levrek dhe krapi) në Bashkimin Europian, ndërsa një pjesë të konsiderueshme zë produkti i përpunuar, ku është dhënë një mbështetje e konsiderueshme nga programi IPARD për modernizimin e fabrikave të përpunimit për eksport. Nga ana tjetër, në muajin Mars, importi i peshkut dhe produkteve të detit regjistrohet në vlerën e 8.5 milionë eurove dhe janë blerë nga jashtë kufijve të Shqipërisë rreth 1890 ton.

Eksporti i peshkut, Mars 2023

Në sasi  858 ton

Në vlerë  5.6 milionë euro

Harta e shteteve ku eksportojmë

Itali

Serbi

Marok

Kosovë

Kroaci

Spanjë

Mali i Zi

Poloni

Maqedonia e Veriut

Tailandë

Greqi

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.