Zhvlerësimi i Euros, “topi” në derën e Financave – Eksportuesit: Presim zgjidhje për lehtësimin e situatës

Pavarësisht se qeveria dhe Banka e Shqipërisë kanë hequr nga vetja përgjegjësinë për të iniciuar ndërhyrje konkrete ndaj normalizimit të kursit të këmbimit, eksportuesit vijojnë të këmbëngulin se kjo situatë duhet trajtuar me seriozitet dhe duhen marrë masa lehtësuese.

Përfaqësues të Shoqatës tonë Proeksport Albania së bashku me Përfaqësues të Shoqatave të tjera Eksportuese dhe Shërbimeve zhvilluan një takim me  grupin teknik të Bankës së Shqipërisë dhe Ministrisë së Financave kryesuar nga  Guvernatori Gent Sejko dhe Ministrja Delina Ibrahimaj ku shprehën shqetësimin për zhvlerësimin e euros dhe humbjet që ka sjellë për një kategori të bizneseve shqiptare.

Eksportuesit bëjnë me dije se pas takimit, u vendos bashkarisht: Krijimi i një grupi pune me përfaqësues të shoqatave eksportuese, teknik të Bankës së Shqipërisë dhe Ministrisë së Financave si dhe Përfaqësues të Bankave të nivelit të Dytë; Vazhdimin e takimeve pranë Ministrisë së Financave s me Ministren Delina Ibrahimaj dhe stafin e saj teknik për të gjetur zgjidhjet e bërë të mundur lehtësimin e situatës ku  ndodhen eksportuesit “Made in Albania” dhe turizmi shqiptar.

Por ndërsa eksportuesit presin zgjidhjet, Ministrja Ibrahimaj është shprehur disa herë se qeveria nuk ka akses që të ndërhyjë pasi Shqipëria ndjek një regjim të lirë të kursit të  këmbimit. Nga ana tjetër deri më tani nuk është marrë asnjë masë alternative për të lehtësuar apo kompensuar eksportuesit.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.