BE deportoi 29% më shumë emigrantë të parregullt në T2 – Shqiptarët të dytët në listë!

Numri i emigrantëve të dëbuar nga vendet e Bashkimit Europian u rrit me 29% në tremujorin e dytë të 2023, kryesisht të kthyer nga Franca dhe Gjermania, tha të premten agjencia e statistikave Eurostat, ndërsa blloku përpiqet të kontrollojë ardhjet jashtëzakonisht të larta.

Nga 105,865 shtetas jashtë BE-së që u urdhëruan të largoheshin nga një vend i BE-së, 26,600 u deportuan në një vend tjetër, një rritje prej 29% nga tremujori i dytë i vitit të kaluar.

Këto shifra përfshijnë njerëz të kthyer në vendet e tjera të BE-së, por një shumicë prej 76% u dërguan jashtë kufijve të bllokut, tha Eurostat.

Gjeorgjianët përbënin pjesën më të madhe të dëbimeve me 9%, të ndjekur nga shqiptarët me 8%, moldavët dhe turqit me 5% secili dhe indianët me 4%, treguan të dhënat.

BE po përballet me valë masive të ardhjeve të ligjshme dhe të paligjshme, një çështje që ka shtyrë Gjermaninë të shpallë kontrolle të reja kufitare me fqinjët Poloninë dhe Republikën Çeke, normalisht brenda zonës së udhëtimit të lirë të Europës.

Gjermania deportoi numrin më të madh të shtetasve jo të BE-së në tremujor, me 3,805 individë të kthyer në një vend tjetër, e ndjekur nga Franca me 3,005 dhe Suedia me 2,690 persona, tha Eurostat.

Të mërkurën, BE nënshkroi një marrëveshje se si të trajtohet imigracioni i parregullt në momentet e mbërritjeve jashtëzakonisht të larta, duke hedhur një hap drejt rishikimit të rregullave të azilit dhe emigracionit të bllokut.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.