BE i jep fund krizës energjetike – Nuk do të ketë më masa mbrojtëse për konsumatorët

Komisioni Europian tha se vendosi të mos zgjasë masat emergjente të prezantuara vitin e kaluar për të mbrojtur konsumatorët nga rritja e çmimeve të energjisë, duke shtuar se ato masa kishin ndihmuar në një qetësim të tregjeve europiane të energjisë elektrike.

Në fund të vitit 2022, Bashkimi Europian prej 27 anëtarësh ishte në mes të një krize akute energjetike të nxitur nga pushtimi rus i Ukrainës, me shtetet anëtare që më pas derdhën qindra miliarda euro në ulje taksash, ndihma dhe subvencione për të trajtuar krizën.

Në një deklaratë për mediat thuhej se komisioni konfirmon se nuk do të propozojë një zgjatje të këtyre masave të krizës, duke kujtuar se këto përfshijnë masa për reduktimin e kërkesës për energji elektrike, kufijtë e të ardhurave për termocentralet dhe rregullat e përcaktimit të çmimeve me pakicë.

Për sa i përket gazit, vendet e Bashkimit Europian ranë dakord që masat ndihmuese të zgjasin për 12 muajt e ardhshëm, deri në mars 2024, me objektiv vullnetar për të frenuar kërkesën për gaz me 15%.

Komisioni shtoi se çmimet e energjisë elektrike tani janë ulur në më pak se 80 EUR/MWh dhe çmimet e gazit jo vetëm kanë rënë, por edhe janë stabilizuar, në masën që rritja e çmimit të energjisë elektrike e vërejtur gjatë gjithë vitit 2022 konsiderohet më pak e mundshme për të ndodhur në dimrin e ardhshëm.

Vendet e BE-së raportuan se ata respektuan gjerësisht objektivin detyrues për reduktimin e konsumit të energjisë elektrike me 5% në orët e pikut – një hap i rëndësishëm për lehtësimin e presionit të çmimeve.

Komisioni tha gjithashtu se disa aspekte të masave emergjente ishin përfshirë në propozimet e tij për rregullime strukturore afatgjata në hartimin e tregut të energjisë elektrike. Këto propozime synojnë të përpiqen të rrisin përdorimin e kontratave të energjisë me çmim fiks, të mbrojnë konsumatorët nga rritja e çmimeve dhe të përshpejtojnë kalimin drejt energjisë së rinovueshme.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.