BE nuk gjen marrëveshje për reformat energjetike – Problemi më i madh lidhet me subvencionet e qymyrit

Vendet e Bashkimit Europian nuk arritën të bien dakord mbi rregullat e reja të planifikuara për tregun e energjisë elektrike të bllokut, pasi u përplasën mbi një propozim për të zgjatur subvencionet për termocentralet e qymyrit sipas reformës dhe një shtytje për të zgjeruar ndihmën shtetërore për termocentralet e tjera.

Takimi i ministrave të energjisë të BE-së në Luksemburg përfundoi pa një qëndrim të përbashkët mbi reformat që synojnë të shmangin një përsëritje të krizës energjetike të vitit të kaluar, kur çmimet e larta rekord të gazit përballën konsumatorët me faturat e larta të energjisë.

Bisedimet u komplikuan nga një propozim i vonuar nga Suedia, e cila mban presidencën e rradhës të BE-së, për të lejuar vendet të zgjasin subvencionet e mekanizmit të kapacitetit për termocentralet e qymyrit që paguajnë gjeneratorët për të mbajtur kapacitetin në gatishmëri për të shmangur ndërprerjet e furnizimeve.

Ambasadorët e vendeve të BE do të vazhdojnë negociatat, duke synuar një marrëveshje këtë muaj.  Polonia, e cila merr rreth 70% të energjisë së saj nga qymyri, mund të zgjasë skemën e saj të mbështetjes për impiantet e qymyrit, potencialisht deri në vitin 2028, sipas propozimit.

Vendet duke përfshirë Austrinë, Belgjikën, Gjermaninë dhe Luksemburgun kundërshtojnë, duke thënë se masa do të minonte qëllimet e Europës për të luftuar ndryshimet klimatike.

Projekt-propozimi, do të lejojë mekanizmat ekzistues të kapacitetit që të heqin përkohësisht një kufi të emetimeve të CO2 – duke u mundësuar impianteve të qymyrit të marrin pjesë – nëse nuk arrijnë të tërheqin mjaft gjenerues me më pak karbon dhe nëse Komisioni Europian miraton përjashtimin.

Qymyri është karburanti fosil që emeton më shumë CO2. Shkencëtarët thonë se përdorimi i tij duhet të bjerë ndjeshëm këtë dekadë nëse bota do të shmangë ndikimet më të rënda të ndryshimeve klimatike.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.