BE vendos rregulla më të rrepta në eksportin e mbetjeve plastike – Kapacitetet e vendeve pritëse të mbingarkuara

Parlamenti Evropian mbështeti me shumicë dërrmuese propozimin për ndalimin e eksportit të të gjitha llojeve të mbetjeve të destinuara për asgjësim, me përjashtim të rasteve të kufizuara dhe të justifikuara.

Propozimi i miratuar përfshin gjithashtu një ndalim të dërgesave të mbetjeve plastike dhe të rrezikshme nga BE në vendet jo anëtare të OECD.

Propozimi përfshin gjithashtu procedura të reja dhe masa kontrolli për dërgesat e mbetjeve. Mbetjet e transportuara jashtë BE-së duhet të menaxhohen në një mënyrë të shëndoshë mjedisore, ranë dakord deputetët.

Sipas propozimit, mbetjet do të rregullohen në varësi të origjinës së tyre, destinacionit dhe rrugës së transportit, si dhe llojit të mbetjeve të transportuara dhe llojit të trajtimit të mbetjeve që zbatohet kur të arrijnë destinacionin e tyre.

Kapacitetet e riciklimit të vendeve pritëse janë të mbingarkuar

Sipas të dhënave të Eurostat, pjesa më e madhe e mbetjeve të eksportuara nga BE përbëhet nga metale me ngjyra, letër, tekstile, qelq dhe plastikë.

Eksportet e mbetjeve plastike nga BE ndikojnë në kapacitetet e kufizuara të riciklimit të vendeve importuese, sipas një raporti nga Environmental Investigation Agency (EIA) dhe Rethink Plastic Alliance (RPA).

Eksportuesit kryesorë të mbetjeve plastike nga BE-ja, si Gjermania, Holanda, Franca dhe Belgjika, po e përdorin këtë opsion për të përmbushur objektivat e tyre të riciklimit.

Shumica dërrmuese e mbetjeve plastike nuk përfundojnë kurrë në objektet e riciklimit dhe eksporti i tyre nga vendet me të ardhura të larta, të cilat janë gjithashtu konsumatorët kryesorë të plastikës, vetëm sa përjetësojnë status quo-në lineare. Në vend të kësaj, fokusi duhet të zhvendoset drejt uljes së konsumit të plastikës, sipas raportit.

Vendet pritëse janë të mbushura me mbetje të importuara, duke kufizuar kapacitetet e tyre për të ricikluar mbetjet e tyre. Këto vende gjithashtu mbajnë barrë mjedisore dhe dëmtojnë shëndetin publik.

Për shembull, Turqia importoi më shumë se një të tretën e 1.35 milionë tonëve mbetje plastike të BE-së në vitin 2021. Mbetjet plastike të importuara përbënin 78.7% të riciklimit në Turqi, me 58% të importeve që vijnë nga BE.

Në vitin 2020, eksportet e mbetjeve nga BE-ja arritën në 32.7 milionë tonë, ose rreth 16% e tregtisë globale të mbetjeve. Për më tepër, 67 milion ton mbeturina transportohen midis vendeve të BE-së çdo vit.

OJQ-të që punojnë për t’i dhënë fund “kolonializmit të mbeturinave”

Lauren Weir e VNM-së tha se aktivistët në mbarë botën kanë punuar pa u lodhur për të nxjerrë në pah provat dhe përvojën reale që tregojnë se tregtia e mbetjeve plastike është e dëmshme dhe shfrytëzuese.

Ajo shtoi se ky është një tjetër hap i rëndësishëm drejt përfundimit të “kolonializmit të mbeturinave”.

“Eksporti evropian i mbetjeve nuk ka kaluar pa kosto të mëdha për mjedisin dhe shëndetin e njerëzve. Sot, Parlamenti i BE-së ka hapur rrugën për një politikë më të përgjegjshme, më transparente dhe të zbatuar më mirë për eksportin e mbetjeve,” tha Stephane Arditi, Drejtor për Klimën, Ekonominë Rrethore dhe Industrinë në Byronë Evropiane të Mjedisit.

Vendet e BE-së tani kanë një shans të fokusohen në parandalimin e mbetjeve dhe të shfrytëzojnë mundësinë për të ruajtur lëndët e para të çmuara dytësore, tha Arditi.

Mbetjet si burim në tregun e përbashkët të BE-së

Me këtë propozim Parlamenti Evropian ka miratuar qëndrimin e tij negociues për bisedimet me shtetet anëtare për tekstin përfundimtar të ligjit të ri.

“Ne duhet t’i kthejmë mbetjet në burime në tregun e përbashkët dhe në këtë mënyrë të kujdesemi më mirë për mjedisin dhe konkurrencën tonë,” tha Pernille Weiss, raportuese e PE për propozimin.

Legjislacioni i rishikuar duhet të mbrojë mjedisin dhe shëndetin e njeriut në mënyrë më efektive, duke shfrytëzuar plotësisht mundësitë e ofruara nga mbeturinat për të arritur qëllimet e BE-së për një ekonomi rrethore dhe zero ndotje, tha PE në një njoftim për shtyp.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.